Imagine a graph... an undirected graph, where there is always a path between any 2 nodes, but it's not a fully connected graph.You can't go through it in a walk ... nor a circuit ... nor a cycle......
you can't use breadth first search.....
you can't use depth first search.....
you just have to wander through it randomly.
Adding a new node is O(1), but deleting a node is computationally exhaustive .... maybe a 3 CNF kind of problems.
To solve the deletion problem you could just add a boolean variable, let's call it "deleted", if it is "true", then the memory is deleted, else its not..... but its not really deleted.. it will always remain there, no matter how long you ignore it.
this is what's inside.....
===============================
===============================
===============================
===============================
===============================
لو وراك مذاكره او بتحل شيييت روح كمل أحسن ... اصل البوست ده طويل شويه
-------------------------------------------------------------------
علي الرغم انني كنت ناوي امسح البوست اللي فات علي اخر الاسبوع اللي فات, و ده في حاله ان محدش بعتلي كومنت يوضح فيه انه فهمه, بس انا حاليا قررت اني ما امسحوش, صحيح احد اصدقائي كان نصحني بكده بس انا ما اقتنعتش, كنت حاسس ان مالوش لازمه يفضل موجود بس انا النت كان فاصل عندي من يوم الخميس لحد النهارده , فأنا اعتبرتها اشاره من السما ان ما امسحوش, بس شكلي انا اللي كنت بطلب كتير يمكن
----------------------------------------
بمناسبه الطلبات الكتير احنا كان طلب مننا دكتور المشروع نجيب شويه افكار كتييييير عشان نختار منها حاجه نعملها, و كالمتوقع الدكتور بيفضل يلففك شويه لغايه ما يروح بيك لمجاله
بعد عناء طويل قدرنا نحن الجروب اننا نوصل لبعض الأفكار اﻷتيه
1
أفا كوجنيشن: برنامج للموبايل تقدر بيه تعرف صاحبك من قفاه, و طبعا ده يتطلب علامه مميزه للقفا, ف لما بتعمل "صاين اب" بنبعت مندوب من عندنا يعلم علي قفاك , و بكده ممكن اصحابك يقدروا يعرفوك من قفاك
2
برنامج موبايل بيشوف اللي تحت الهدوم: طبعا شارح نفسه )يعني يشوف الهيكل العظمي و القلب و الرئتين"عشان فيه ناس بتفهم غلط"( ء
3
لعبه بيكون اللاعب فيها تاجر في السوق السوده و بيبيع كبد و كلاوي و قلوب و اي اعضاء داخليه للإنسان, و كل ما تبيع اكتر كل ما تكسب أكتر , و تحاول تهرب من البوليس باﻷعضاء اللي معاك قبل ما تتلف
و علي فكره انا قولت الفكره دي للدكتور .. بس رد فعله محذوف للرقابه
4
لعبه بيكون فيها اللاعب رئيس جم... أأأه احم ..."عمده" "قريه" عشان بيتنا ما يتخربش كما قال الدكتور, و بيكون "العمده" )لاحظ علامات التنصيص( فيها بيحكم "قريته" و بيحاول يحل المشاكل اللي فيها زي التعليم و البنيه التحتيه زي "ترعه" "القريه", "كوبري" "القريه" و
"ساقيه" "القريه"
و ممكن "القري" تتحد مع بعض و تعمل "منظمه القري المتحده" و ممكن يبقي فيه تحالفات بين "القري" و بعضها و حروب و كده
و لك ان تتخيل و أنا كنت بحاول أشرح الفكره دي و طول ما انا و الدكتور قاعدين نتكلم بنعمل علامات التنصيص بإدينا
أعتقد ان لو كان حد شافنا من بره المكتب كان هيعلق تعليق مش ظريف
أعتقد ان لو كان حد شافنا من بره المكتب كان هيعلق تعليق مش ظريف
5
حله المحشي الالكترونيه , اللي هتحتاجها كل ست بيت مصريه و الحله دي بتقور و تقشر و تعمل الخلطه و تحشي و تسخن و انت تاكل علي طول
6
شعر السدر حسين: برنامج للموبايل بيعد شعر السدر )الصدر ( و ده مش عارف مين اللي ممكن يستعمله , بس أكيد كل حاجه و لها زبونها
و كفايه كده افكار عشان الرقابه
----------------------------------------------------------
بمناسبه الكلام عن المشاريع ف انت لو في اسكندريه هتلاحظ ان الناس هنا بتركب المشاريع , او بمعني تاني الميكروباص في اسكندريه اسمه مشروع... ليه انا ماعرفش, و لا اي حد من الاسكندرانيه اللي سألتهم
----------------------------------------------------------
بمناسبه الكلام عن المواصلات , كل محافظه روحتها بيبقي ليها طابع خاص في المواصلات, يعني مثلا في بورسعيد المواصلات كانت رخيصه نسبيا, يعني انا فاكر لما كنت في معسكر تبع الجامعه في بورسعيد )هحكيلكوا عليه شويه كده( كان احسن لي ان بدل ما ارجع في اتوبيس الجامعه "اللي هو اساسا كان ميكروباص بيحاول يعمل نفسه ميني باص" و اروح اسكندريه و بعدين ارجع, كان اسهلي و احسن لي و "ارخص لي" ان اروح دمياط علي طول من بورسعيد, بعد ما استأذنت من المشرف خرجت ركبت تاكسي من بعد معديه بور فؤاد لموقف دمياط, تقريبا الطريق اخد مع الزحمه من 20 ل 30 دقيقه, و بعد كده لقيت السواق اخد 3 جنيه بس, في حين لو كنت في اسكندريه كان المشوار ده اتكلف اكتر من 10 جنيه فور شور
القاهره بقي كبيره و حر جدا, عمري ما روحت هناك اللا و لعنت السبب اللي خلاني اروح, الواحد بيبقي حران و في نفس الوقت العرق قليل عشان الرطوبه قليله, بس تيجي تمسح وشك تلاقي كميه من التراب و الطين
انا فاكر أول يوم روحت فيه الكليه الحربيه "و أكيد ما نجحتش طبعا و إللا ما كنتش دخلت هندسه و اتعرفت علي الناس الكويسه اللي انا معاها النهارده" كان يوم حر جدا )كنا في الصيف طبعا( و كنا مخلصين ثانوي عام و روحنا و دخلنا الكليه الحربيه و كان يوم
طبعا كانوا بيصورونا هناك و احنا عاملين الوقفه العسكريه "امال لو حكيت لكم علي الكشف الطبي" , المهم انا كل للي شوفته من الصوره هي نقطه سوده في رمادي في بني "اللي هيا دماغي" فوق تي شيرت مكتوب عليه "وانتيد" بالإنجليزي و رجل معدوله و رجل تانيه متنيه
طبعا شاء العليم القدير ان يومها التي شيرت الوحيد اللي نضيف يومها كان مكتوب عليه"مطلوب من العداله" و يشاء برضه العليم القدير ان يمسكني ظابط يومها "و كان رتبته مقدم" و يقوللي ايه اللي انتا لابسه ده, و بعد محاضره لمده 5 دقائق عن الحياه العسكريه و الانضباط خلاني ارجع اقعد مكاني و طبعا كان كل الي حواليا بيفكروا في حاجه واحده و هي انني اتعلم عليا, بس عشان الفضول اللي عندكم أنا عارف ان فيه حد دلوقتي بيتسائل"عرفت رتبته ازاي؟" اكيد انا مكانش من هواياتي انني اعرف الرتب العسكريه و لا حتي عشان مقدم للدخول في كليه عسكريه بس انا كنت في مدرسه ثانويه عسكريه و فضلت ادرس الرتب مع الشخشخنات و الناشنكاه و الدبشك و سن نمله الدبانه لمده 3 سنيين
بس برضه التي شيرت مكانش سبب اني ما كملتش, ..... اللي المقدم ما اخدش باله منه انني اساسا كنت يوميها ماشي ب أعرج و ده عشان كان قبلها بيومين و انا ب أتمرن عملت حركه بسيطه جدا بس كانت بتخليني أعرج , عرفت بعدها بسنه انني عندي قطع في الغضروف الهلالي "اللي جنب الرباط الصليبي" و ربنا يسامح الخمس دكاتره اللي روحتلهم و ما عرفوش عندي ايه
بس اكيد يعني طلعت في كشف العظام, و يمكن احكي عن الموضوع ده شويه كده او في بوست تاني
المهم نرجع للمواصلات, انا دايما في القاهره رغم انها كبيره اللا اني بحس انني عارف السكه فيها, ده حتي انا ما تهتش هناك غير مره واحده بس , لكن في اسكندريه رغم انها صغيره نسبيا فأنا تهت فيها كتير "فروم داي وان" بس القاهره لسه فيها موضوع التباعين في الميكروباص, و ده كان زمان موجود في دمياط بس دلوقتي اختفي, بس لاقيته في المنصوره من اسبوعين لما كنت هناك
طبعا وجود التباع بيخليك تدفع اول ما تطلع, بس في دمياط السواقين غالبا ما بيحبوش ياخدوا الاجره اللا لما الزبون ينزل
في اسكندريه اول ما بتطلع بتدفع, و او طالع من موقف المواصلات ف السواق بيخلي الزباين يلموا الاجره ورا مع بعض و يبعتوهالوا حته واحده
في القاهره و اسكندريه لازم تقول لسواق التاكسي انتا رايح فين قبل ما تركب و غالبا قبل ما توقفه اساسا, و اول ما روحت اسكندريه كنت كل اما لركب تاكسي السواق يتفق معايا علي الاجره الاول , بس دلوقتي بيعملوا كده من الموقف الجديد بس
دمياط و المنصوره انا ما شفتش فيهم الحاجات دي
في دمياط تلاقي علامتين بس للميكروباصات "علامات بالايد طبعا, و مش شتايم " اما في اسكندريه و خصوصا لو انتا علي البحر بس من ناحيه البيوت هتلاقي كل واحد واقف جنبك بيشاور علامه شكل و السواقين ممكن يكونوا بيشاورا حاجه تانيه خالص , عندك مثلا )المندره , 45 , الساعه , سيدي بشر , الموقف , العصافره ..... ء( و طبعا كل واحده منهم علامه شكل
---------------------------------------------------------------------------
بمناسبه الكلام عن البحر, فأنا من يومين )الجمعه( كان النت عندي فاصل و مكانش ليا نفس اذاكر ولا اقرأ حاجه فقررت "و يا ريتني ما قررت" اني اغير مساحات البارتشنز اللي عندي علي الجهاز عشان ادي السيستم مساحه زياده علي اللينكس و بالمره اصطب ويندوز 7
بعد 3 ساعات من اللعب اكتشفت اني صطبت اللينكس اربه مرات)و النهارده الخامسه( و زودت مساحه بارتشن 10 جيجا و عملت 3 بارتشنز مساحه الواحد فيهم 175 ميجا و برضه ما صطبتش ويندوز 7 ﻷن ال دي في دي شكله باظ و ما بيقراش غير سي ديز
و اللينكس اللي انا صطبته 5 مرات ده اقدم من اللي انا كنت مصطبه اساسا " دي كانت اخر مره استعمل فيها هيرنز بووت سي دي" .. و
كان صاحبي الجيار وصل من السفر فقررنا كالعاده لما بنبقي "حاسين" اننا فاضيين اننا نخرج نتمشي علي البحر )راجع قصه سامح( و نزلنا و يا ريتنا ما نزلنا كنا ناويين اننا نروح للراجل بتاع النت بس سبحان الله نسينا, بعد ما خرجنا و طلعنا علي البحر "و هو خطوتيين من الشقه اللي احنا ساكنين فيها السنه دي في الشاطبي )جنب الكليه ... نياها ها ها ها(" بصينا لقينا فيه حادثه و الناس ملمومه و عربيه الاسعاف في نص الطريق و بيدخلوا فيها واحده شابه كل شويه تحاول تقوم و يرجعوها تاني
واحد ما اعرفوش: كابتن, هو ترينكيس من هنا و لا من هنا
الجيار: ت ايه ؟
الواحد اللي ما اعرفوش: ترنكيزز
انا: درينكيز؟
الواحد اللي ما اعرفوش: اه
انا: ما اعرفش
دماغي -1: يا عم ما تقوله, ما هو هناك اهو عشان ما تبقاش كذاب
دماغي 1: احنا مش ناقصين ذنوب ابوس ايدك
و هنا لقينا بتوع الاسعاف بيجروا لحد لما وصلوا رصيف الكورنيش و فيه زحمه جامده هناك, الواحد اللي ما أعرفوش جري و عدي الشارع عشان يتفرج و انا و الجيار برضه قررنا اننا نعدي الشارع
هنا فيه وقفه: احنا كنا ما بين نفق كامب شيزار و نفق الشاطبي و انا دايما بعدي من النفق حتي لو بعيد و ده اي انسان طبيعي المفروض يعمله, عشان ما يحصلوش زي الناس اللي في الحادثه دول و ده ﻷن مافيش عربيه بتمشي في شارع البحر ده اقل من 80كم/س
و اللي يتلدع من الشوربه ينفخ في الزبادي
بس ساعتها العربيات كانت مبطئه عشان تتفرج و مافيش حد باصص علي الطريق , و انا كل اما اكون جنب عربيه اخبط عليها عشان اللي سايق ياخد باله من الناس اللي هوممكن يدوسها
و هنا فيه وقفه تانيه: انا بكره لما بشوف حد مقعد طفل صغير في الكرسي اللي قدام , او تكون ام شايله النونو بتاعها علي حجرها في الكرسي اللي قدام برضه
القانون بيقول 7 سنين علي الاقل, و برضه بيقول احمي نفسك من خطأ الغير يعني انت ممكن تكون مايكل شوماخر بس حد يخبطك من الجنب او من ورا و الطفل بموت و ساعتها تقول يا ريت اللي جري ما كان
بعد ما وصلنا للضحيه التانيه اول ما شفته اتخضيت من منظره و دورت وشي لا اراديا لغايه اما تمالكت نفسي و قدرت ابص
كان دمه سايح علي الارض و بيطلع دم من بقه و دراعه مكسور من اكتر من مكان و كان قاعد يتحرك حركات بطيئه و لما بتوع الاسعاف حاولوا يمسكوه قعد يفلفص منهم و يحاول يقوم لغايه اما واحد من بتوع الاسعاف عدل له ايده المتكسره و ربطوه في النقاله و حاولوا يشيلوه و الناس اللي واقفه منهم اللي قاعد يقوله اتشاهد يا بني و منهم اللي قاعد يتريق عليه عشان كان عايز يعمل جدع علي البنت اللي كانت معاه و يعديها من وسط العربيات
انا ما اعرفش البنت دي كانت معاه و لا ﻷ و ان كان, ما هي ممكن تكون اخته أو خطيبته, هو صحيح الاحتمالات مش هتساعده هنا بس ان بعض الظن اثم
الراجل ما اعرفش حصله ايه بس منظره و هو بيفرفر كده زي ما يكون بيطلع في الروح و انا شوفت المنظر ده قبل كده بس في العيد الكبير لما العجل بيتدبح بيقعد يفلفص بنفس الطريقه
و كتفه اللي بقي كذا حته فكرني باليوم اللي كنت رايح فيه سيدي جابر بعد ما خلصي اعدادي هندسه و كنت في الصيف, و انا ماشي و يادوب لسه كام خطوه و اوصل سموحه كان فيه واحد بيدهن عماره معموله جديد , انا شفته و هو عند الدور التالت لحد ما وصل للأرض و ما استوعبتش المنظر اللا لما الناس اتلمت و كلهم زقوني عشان يوصلوله كان بيني و بينه اقل من 3 متر بس اتسمرت في مكاني لما شوفت المنظر, بصيت لفوق و كانت السقاله في الدور ال 13 و كانت مفكوكه من ناحيه واحده و هو ده اللي وقعه
و كان كل حاجه فيه متكسره بس كان لسه عايش, و حظه انه وقع علي جنبه مش ظهره, و الحمد لله اني ما كنتش ماشي بسرعه شويه و الا كان نزل فوقي
زي ما حصل يومها حصل يوم الجمعه فضلت ماشي ساكت و قعدت افكر في اللي حصل
الطبيعي لما انا و الجيار بنمشي مع بعض بنفضل نهزر و نضحك و ما بنبطلش كلام بس يومها فضلنا لحد ما وصلنا محطه الرمل ما اتكلمناش كلمتين علي بعض
و بعد ما شربت شويه قصب اتكلمت انا و الجيار في الموضوع و ان ازاي ان الانسان المفروض يصلح من نفسه عشان يبقي كويس و ينفع الناس و يدخل الجنه
و بعد شويه نسينا الموضوع لحد لما و صلنا عند باب شرقي و قمنا طالعين عمودي عشان نوصل لشارع بورسعيد, و احنا في الطريق كل شويه تعدي علينا عربيه اسعاف و تاخد حوده شكل زي ما يكون كل حته في اسكندريه فيها حادثه
بعد شويه قابلنا ناس في عربيه و تاكسي بيحاولوا يوصلوا البطاريتين ببعض عشان العربيه تشتغل, فسواق العربيه قالنا نساعده, قعدت مكان السواق و دورت المفتاح و دوست بنزين "و طبعا اللي جرئني اني اعمل ده كله اني معايا رخصه و متدرب في المرور" بس علي فكره انا ما بعرفش اسوق و يمكن احكي موضوع الرخصه ده في يوم تاني بس ده كان من غير وسايط عشان انا ما بحبش الوسايط, و كمان لو دخلت اختبارات السواقه دلوقتي هجيب فيها 100% تاني ..... علل, بم تفسر مع ذكر السبب؟
حافظ مش فاهم يا فندم*
المهم بعد محاولات عده اكتشفنا ان البطاريه فاضيه علي الاخر فوصلنا الراجل و العربيه )"زقا" "زقن" "زقان"( و كملنا مشي لحد ما وصلنا ل بتاع النت
و بعد نص ساعه خرجنا من عند بتاع النت
الجيار: ايه يابني اللي انت عملته ده
انا: عملت ايه يعني
الجيار: ده الراجل كان هينهار من اللي انت عملته فيه
انا: ما انتا شوفت اللي حصل, ابن خالته اللي دخل في الموضوع من غير لازمه ده دايقني, و العضلتين اللي هو مربيهم مفكر انهما هيخوفوني
الجيار: طب ابقا قولهم في الشقه ان انا اللي اتشاكلت معاه
انا : بييس
اتشاكلت يعني في لغه اسكندريه و البحيره "اتعاركت" , طبعا هما ال 2 مش زي بعض بس انا مش متخيل فيلم اسمه "ميدو معارك" يمكن فيلم "عنتره معارك " يبقي احسن
بعد ما روحنا الشقه فضلت قاعد اقرأ في كتاب ما كنتش خلصته "بس خلصته النهارده .. نياهاها" قومت علي الساعه 4 ألبي نداء الطبيعه
أنا كنت في الحمام ساعتها -
خبط عليا الجيار و قالي ألحق فيه حادثه حصلت بره. بعد ما طلعنا و صلنا للبحر و عدينا الشارع و كان الشارع فاضي بس كان فيه ناس ملمومه علي الكورنيش
اللي حصل كان ان فيه عربيه بتزنق علي عربيه تانيه"رغم ان الشارع فاضي" بس فيه ناس خمنت انهم كانوا بيتسابقوا و كمان كان شكلهم شاربين حاجه بسفي ناس قالت ان اختلال توازنهم ده من الحادثه, المهم واحد فيهم اخدته الاسعاف و واحد اتعور في ظهره و التالت كان كويس, بس العربيه كانت طلعت علي الرصيف و كسرت عمود النور و كسرت جزء من الكورنيش "الحته اللي بيقعد فيها الناس الحبيبه" و العربيه كانت مقلوبه علي جنبها و مش باين لها اي ملامح
انا: جيار .. احنا ملناش عيش في البلد دي يا بني
الجيار: اه
كان انا و الجيار جه في بالنا حاجه واحده و هي الحادثه اللي شوفناها السنه اللي فاتت و احنا بنتمشي علي البحر من ناحيه البيوت و ده كان قبل قصه سامح , و دي كانت الحادثه الوحيده اللي شوفتها بتحصل من الالف للياء في حياتي
كان فيه عربيتين بيتسابقوا الساعه 2 بالليل رايحين ناحيه شرق اسكندريه "ميامي و المندره و 45 و الحتت دي" و احنا كنا ماشيين عكسهم رايحين ناحيه ستانلي و كنا يادوب لسه معديين سان ستيفانو, العربيه اللي علي الشمال زنقت علي اللي علي اليمين ف الراجل فقد السيطره علي العربيه و حود شمال ناحيه الجزيره اللي بين الشارعين "الرايح و الجاي" اللي هي الرصيف اللي بيبقي في نصف الشارع و العربيه غيرت اتجاهها و بقت بتبص عكس الاتجاه و بعدين عدت الجزيره و وقفت. هنا انا كنت حاسس انني في فيلم اجنبي ﻷن الحاجات دي ما شوفتهاش اللا في الافلام, بس لسه ما خلصتش, اللي حصل بعد كده ان عربيه من الطريق اللي استقرت فيه العربيه كانت ماشيه بسرعه ف خبططها و طلعت علي الرصيف و بعدين خبطط في عمود النور , و في اقل من 1/2 ثانيه كانت عربيه تانيه خبطط العربيه اللي كانت مستقره بعد ما عدت الشارع و غيرت اتجاهها و خبطط في العربيه اللي لسه خابطه في العمود فالعمود اتكسر و اتكسر جزء من الكورنيش
الحمد لله ان بعد كل ده ما حدش حصله حاجه
بس من اللي حصل ده كله نستنتج حاجتين
1
لو فيه نفق قريب منك او لو حتي هتمشي شويه عشان توصله ما تترددش عشان ده أأمن
2
لو ماشي علي الرصيف حاول تمشي علي الرصيف اللي عكس اتجاه العربيات و بكده ممكن تشوف العربيات اللي جايه عليك و ممكن كده تقلل فرص اصابتك ﻷن علي ما يبدو انك حتي لو ماشي علي الرصيف ممكن العربيات تطلع و تدوسك فوق
سيبكوا بقي من جو الغم ده و هاحكيلكوا علي موقف غريب بس طريف و بدون قصد
انا كنت ماشي في دمياط ساعه الظهر و تقريبا كنت رايح تمرين السباحه, يعني غالبا كنت لسه مخلص سنه تانيه في الكليه و صلت للمكان اللي بركب منه و هناك كان فيه اتنين واحد منهم سألني
الراجل1: لو سمحت , نروح البوسطه منين
انا: اركب عمر
الراجل1: ايه .. اركب ايه , مواهاهااا اهاهاهه ... اهاهاها
كان الراجل 1 بيضحك و بيبص علي الراجل التاني اللي كان بيبصلي زي ما اكون لسه ضربه علي قفاه, الراجل1 من كتر ضحكه سند علي الراجل التاني
انا طبعا من السؤال كنت استشفيت انهم من بره البلد, و من رد فعل الاتنين خمنت ان اللي ما كانش بيضحك اسمه عمر
رفعت حاجبي اليمين و نزلت الشمال عشان ابدي استغرابي من اللي بيحصل, و هنا سمعنا صوت السواق بينادي
السواق: عمر عمر عمر عمر .... اللي جاي عمر .... 1 عمر
انا: اركبوا عربيه عمر افندي
و هنا رجع وشهم طبيعي بعد ما عرفوا ان عمر ده هو عمر افندي و ان في دمياط بنقول اركب عمر عادي جدا, و اتضحلي من حوالي اسبوعين ان في المنصوره برضه في عمر , بتقول للسواق عمر , تركب عمر , و تنزل عمر
و الى اللقاء في بوست تاني قريبا ان شاء الله
