motivated by Sallam :XXXXD

من زمان ما كتبتش حاجه , و بعض اﻷصدقاء "سلام" ألحوا عليا الحاح شديد , لدرجه انهم كانوا هيبوسوا ايدي عشان اكتب حاجه جديده

هم: الحقنه, فين الحقنه

أنا: خد يا زلفي

البوست اللي فات كان مش واضح للكثيرين و ده كان باين من ال أوف لاين كومنتس اللي اتقالتلي لدرجه اني احتاجت اشرح الموضوع لبعض الناس "اسلام" و قعدنا نتناقش في المواضيع كلها اللي انا اساسا كان الغرض اﻷساسي اني ما أناقشهاش عشان يفضل رأيي من دماغي و مش متأثر بكلام حد, و كمان أنا انسان مجادل بطبعي و الحاجه الوحيده اللي تخليني اتنازل في نقاش هي اني ألاقي سبب منطقي بالنسبه لي يمنعني من اني اكمل و ده فكرني باليوم اللي كنت بأتناقش مع دكتور عندنا في الكليه في موضوع موقع الكليه و موقع القسم, في لحظه من اللحظات كان واضح انه مش هيتنازل و بدأ هجوم شخصي عليا خصوصا انه فكر اني مش بستعمل الموقع ﻷني من موافق عليه

,"هو غلطان, اي جست دونت جف أ دام"

بس ساعتها افتكرت اليوم اللي انا و قطب اللي كان معانا في النقاش اننا في مره قبلها كلمناه انا و هو في نفس الموضوع و وصلت في الاخر لنفس النتيجه (جدال لمجرد الجدال) و عليه ف بمبدأ شعره معاويه سكت "رغم ان كان عندي قنابل" بس مش موضوعنا, انا اساسا لو كنت اتكلمت اكتر كنت اكيد مش هستحمل العواقب (ده عارف اسمي و رقم جلوسي يا عم) , المهم ان الموضوع اللي مكانش واضح هو و بكل بساطه الدين و السياسه

ذات از ات

انا كنا قلت من صغري رأيي من دماغي و باخد قراراتي بناء علي تحليل مفصل و كامل لجميع الجوانب , بس الجوانب اليومين دول كلها لخبطه, و اﻷسف ان الواحد معندوش خلفيه تساعده و اي كلمه قد تبدو مقنعه في وقت ممكن تبقي غير منطقيه بالمره في وقت تانيو ده في كلا الموضوعين و ده بيعتمد علي حاله الانسان ساعتها و على اللي بيكلمه و قوه اقناعه مش قوه منطقه, و عليه فقد قررت مجموعه من القرارات في الموضوعات دي بس تنفيذها مش وقته دلوقتي , بس هانت

------

المهم, انهارده الجمعه 10 ديسمبر . انا كنت مستني اليوم ده بفارغ الصبر ﻷن كان فيه ناس بتتكلم عاى النت عن عصيان مدني جماعي في كل المحافظات و هينتهي بإقاله الريس و الحكومه و تعيين حكومه جديده ! كل ده كلام زي الفل بس الناس دي طلعوا عيال و رجعوا في كلامهم و لا حد عمل حاجه الراجل اللي بيقول انه "المقدم أيمن أحمد سالم ال" اللي ناشر حجات علي النت قفل الموقع بتاعه زي ما قال و لا عاد حد سمع حاجه عن الموضوع, بعد الصلاه قعدت على النت ادور على اي حاجه عن الموضوع عصيان مدني , مظاهره , تجمع , فرح او حتى طهور ما شفتش حاجه, كل اللي اكتشفته ان فيه كذا جروب علي الفيس بوك قرروا انهم يعملوا مظاهره الاسبوه الجاي , و غيرهم اللي بعده , ﻷ و الاحسن من كده فيه ناس اتفقت تعمل مظاهره الاسبوع اللي فات! بس يظهر ان انا كنت نايم, المهم طلع كله كلام في كلامو و يظهر انه معاد اسبوعي "هنتلم بعد صلاه الجمعه نعمل مظاهره و بعدين نروح نشوف الماتش" و لكن يبقي الوضع على ما هوعليه. و بما ان انا كنت قررت اني مش هكتب علي البلوج ده حاجه في السياسه فهنا نتوقف عن هذا الموضوع

-----

أما بالنسبه للحاجات اللي انا شوفتها النهارده اني و انا رايح الجامع و ماشي من علي البحر "من ناحيه البيوت" شوفت حاجات عجيبه شوفت خير اللهم اجعله خير "كابلز" ماشيين علي البحر "ساعه الصلاه" و ممكن تقوللي انهم مسيحيين او اجانب , بس الايشارب ما بيقولش كده

طب لو هي مفكره انها كده بتجر رجله عشان ممكن يتجوزها , طب ازاي تثق انه هيصونها اذا كان هو ساعه صلاه الجمعه سايب الصلاه و قاعد يتمشى معاها علي البحر

تقوللي ممكن يكون خطيبها, اقولك ايه يعني, نفس الشئ برضه

طب هو راجل و ممكن يخرج في اي وقت عادي هي خارجه في يوم اجازه ساعه الضهر بحجه ايه ,"بتاخد حمام شمس و لا بتعمل تان" و اللي في البيت عندها يا تري عارفين

و المشكله انهم مش واحد و لا اتنين, ﻷ دول كتير

و هنا أقول كما قال القائل: اذا كان رب البيت بالدف ضارب, فسيمه باقي اهل البيت الرقص

ماهو السيد الوالد اللي سايبها تنزل بالبنطلون"المدهون على جسمها" هو السبب, ممكن تكون مراته "امها" ضغطت عليه بحجه ان البت عايزنها تتجوز (منطق غريب و متخلف, ما ينفعش حتي يتقال عليه منطق) بس اذا هو اقتنع فده معناه انه فقد جزء كبير من رجولته و بقي ديوث و راضي ان بنته تشوفها كل عين, و ان كانت اﻷم موافقه و اﻷب مش موافق و البنت بتخرج كده من ورا ابوها, او ان كان مافيش أب ف كده برضه المشكله هو اللي عملها حتي لو مات ﻷن كده هو بيعق أبنائه ﻷنه لم يختار لهم اﻷم الكويسه اللي ترعاهم و تعلمهم

و ان كانت البنت هي اللي مش تمام و ماشيه علي حل شعرها و أهلها مش موافقين على اللي هيا بتعمله, ففيه حلول كتير اوي و على جميع الدرجات ابتداءا من اللين و انتهاءا بالشده

و فيه حاجه تانيه شوفتها "هما 50 متر اللي مشيتهم و شوفت فيهم عجب العجاب" كافيتيريا مشغله بنات جرسونات و لبسهم عيب عيب جدا, من نوع البنطلون المدهون برضه, و مش كافيتريا واحده , ﻷ كتير

و بعد التحدث مع بعض الجيران في الموضوع قالولي انهم كلموا صاحب الكافيتيريا اللي جنبنا في الموضوع ده فقالهم ان البنات دي فاتحه بيوت و هو مش عايز يقفل البيوت دي

نووو كومنت

---------

موضوع اخر يصب في نفس الترعه دي و هو الكوره

انا مش من مشجعي الكوره, انا اهلاوي اسما بس دي حاجه ملهاش اي معنى عندي , عمري ما قعدت اشوف ماتش للاخر اللا عشان اللمه بتاعت اﻷصحاب, و عمري ما اهتميت اشوف التحليل الفني ﻷي ماتش او اي حاجه من دي "بكل بساطه: ملهاش لازمه" و التليفزيون عندنا في الشقه كان مش شغال من قبل العيد

كان واحد ابن حلال ماشي يقطع اﻷسلاك اللي بره على الحيطه و منهم بتاعنا رغم انه دش مش وصله , بس حرب الوصلات ما بتفرقش بين دش و وصله

المهم الناس اللي معايا في الشقه قرروا انهم هيصلحوا السلك و فعلا صلحوه, و من ساعتها التليفزيون ما بيتحولش من عبى القنوات الرياضيه اللا على القنوات الرياضيه, ماتش هنا و تحليل فني هنا, و تيجي تكلم الناس يقولولك ان دي حاجه بتبسطهم زي الهوايه , حتي فيه بعض الناس اتجرأت و شبهتها بحبي لممارسه الرياضه و لكن هيهات

انا ممكن العب كوره لكن اتفرج عليها ده مش اسمه رياضه

و تيجي تسأل الواحد من دول تلاقيه حافظ الفورماشن بتاع كل الفرق و اسماء اللاعبين, و طبعا يطلع اراءه الحكيمه في مدح و ذم و تعديل خطط المدربين , يتحرق دمه لما فريقه ما يجيبش جون و يسب و يلعن في الحكم و اللاعبين و اللي قاعدين جنبه و نقاشات لا تنتهي عن الكره

الناس بقت مغيبه, و ييجي بعد كده يقولك حال البلد بايظه علل؟

يقولك انا هقاطع الانتخابات و هو لا عنده بطاقه انتخابيه و لا عمره راح ينتخب, و يمكن ما يعرفش المكان اللي المفروض ينتخب فيه فين او مين اللي مترشح

يقولك انا هقاطع البضايع الامريكيه و الدينماركيه و هو اساسا معهوش تمنها و تلاقيه المسكين مش عارف ان مصر بتاخد معونه من امريكا

الناس مغيبه, ما تعرفش حاجه عن السياسه, و كل واحد عامل نفسه علامه في الدين و قاعد يفتي و ييجي يقولك البلد بايظه

"و من اعمالهم سلط عليهم"

"إن الله لا يغير ما بقوم حتى يغيروا ما بأنفسهم"

علي ابن ابي طالب رضي الله عنه لما تولى الخلافه قال للناس "كنا نحن فكان فينا أبو بكر و عمر, و كنتم أنتم فكنت أنا فيكم" و ده معناه من اﻷخر ﻷي واحد يحاول بعد كده يقول البلد بايظه و الناس بقت وحشه يبص لنفسه اﻷول و بعدين يتكلم على غيره

انتهت