Friday, April 16, 2010

سامح

كان يوم من الايام الرخمه كالعاده الخالي من المذاكره, خالي من الانتاج , خالي من كل حاجه
كان يوم حد , و كان ليله شم النسيم
قررت انا و الجيار صاحبي اننا ننزل نتمشي شويه في الشارع علي البحر
اول ما نزلنا في ميامي علي البحر و علي الرغم من ان الجو كان برد شويه الا ان اغلب الناس كانت بتاكل ايس كريم و طبعا دي حاجه ما يتسكتش عليها فقررنا نجيب ايس كريم من جيلاتي عزه, و كان زحمه جدا, و زي كل مره بجيب ايس كريم من هناك الراجل بيكون لابس جوانتي في ايد واحده (غالبا) و يمسك البسكوته بالجوانتي و يقعد يظبط الايس كريم بإيده التانيه , مش بالمعلقه و لا بالجوانتي لأ بإيده
المهم ......... المشي طبعا بيبقي لمسافات طويله و ساعات طويله جدا, بس المره دي مشينا لحد كوبري ستانلي بس و طول السكه قاعدين ننكت و تضحك علي حالنا(ال يعني حالنا يضحك اوي) و فتكر الحوادث اللي شوفناها علي الطريق بتاع البحر و اللي مش لازم تكون غلطان عشان تكون جزء منها , و لا حتي لازم تكون ماشي في الشارع عشان تتداس
و اللي طبعا خلانا متحفظين طول الطريق علشان العربيات اللي جايه علينا زي ما يكونوا بيلعبوا
need for speed
بعد ما قربنا علي ستانلي و كنا ماشيين من ناحيه المباني مش من ناحيه البحر و كنا ماشيين جنب كافيتيريا اسمها
zanelli's
شوفنا منظر خلانا نبطئ شويه بشويه لحد ما وقفنا علي بعد 10 خطوات
وقفنا و بصينا لبعض زي ما نكون متضايقين من نفسنا و اننا لازم نرجع
*******************************
.........الجيار: ايه
...انا: مش عارف
الجيار: ما ينفعش نمشي كده.... مش كده؟؟
انا: اه
*******************************
كنا شوفنا طفل صغير نايم علي الرصيف جنب الهوايه بتاعت الكافيتيريا, شاكله ما يزيدش عن 5 او 6 سنين و نايم جنب الهوايه عشان مطلعه هوا سخن من مطبخ الكافيتيريا
رجعت انا و الجيار عند الولد و وقفنا جنبه عشان نشوف ماله
كان قاعد علي السلمه اللي حولين الكافيتيريا و حاطط ايديه علي رجليه زي ما يكون مربع ايديه و نايم عليهم و كان جنبه كيس
كان لابس جاكيت جينس و بنطلون قماش بس كان قصير عليه
انا فكرت انه ممكن يكون تايه او حاجه و ممكن نرجعه بيته و خلاص و ده فكرني بالمره اللي تهت فيها و انا بدور علي ابن خالتي عشان العب معاه, و ده كان و انا في اولي ابتدائي و طبعا لما اكتشفت اننا تايه كنت مرعوب و اللي يرعب اكتر ان الناس في الشارع هما كمان عرفوا من شكلي ان انا تايه و حاولوا يعرفوا مني انا مين بس انا كل الي كنت اعرفه هما ماما و اختي و نينه و طنط و من غير القاب كمان
و الناس لما ما عرفوش يوصلوا لحاجه سابوني امشي ( الواطيين) بس الحمد لله كنت تايه تحت بيت عمتي
و طبعا اتحرمت من النزول للشارع لحد ما بقيت في سنه رابعه
كل الذكريات دي و انا واقف جنب الولد انا و الجيار مش عارفين نعمل ايه
.......فا حاولنا نصحيه
******************************
الجيار: انت يا حبيبي , انتا يابني(و يطبطب عليه بالراحه) انتا يا ابني
انا: اصحي يا حبيبي انتا نايم في الشارع
وبعد كام محاوله
انا: اصحي يا حبيبي, انتا اسمك ايه؟؟؟
الولد: .... اهه .. سامح ..خخخ
انا: بابا فين يا سامح, ماما فين يابني
*******************************
لاكن سامح كان نام و تقريبا الولد كان تعبان جدا و كتن قاعد يهرش في رجايه كتير مش عارف بقي لأنه ما استحماش من زمان و لا من الناموس اللي في البرد ده
الساعه كانت عدت 11 و كان باين انه مش تايه, شكله من العيال السرييحه اللي بيبيعوا اي حاجه في الاشارات
........حاجه تزعل
في يوم زي ده في وقت زي ده من 15 سنه و زي كا الاطفال اللي في السن ده انا كنت انا و اختي قاعدين معا ماما نلون البيض علشان شم النسيم بكره
اللي بيحصل للولد ده ظلم, ازاي اهله يعملوا فيه كده, و يعني هو لو اشتغل في السن دي و جاب فلوس هيجيب كام و لا هيصرف علي مين
ده عنده 5 سنين
و بكل الشحنات دي جوايا طلعت الموبايل
*******************************
الجيار: ايه يا عم,انتا ها تعمل ايه؟؟؟
انا: هاتصل بالشئون الاجتماعيه يشوفوا هيعملوا ايه
الجيار: يا عم بطل هبل , احنا مالنا
******************************
و بعد مناقشات طويله مع الجيار في الموضوع ده و ايه الصح, و البلد ماشيه ازاي , و التقاليد , و الملاجئ و كل الحاجات دي اترددت بس ما شلتش الفكره من دماغي
و الجيار قرر انه هايروح يجيب للولد اكل و شابني معاه و راح لبقال
و طول ما انا واقف في ناس معديه رايحه جايه جنب الولد و لا كإنه موجود , و الناس بتدخل و تخرج من الكافيتيريا و لا كإنه موجود , يبصوا عليه و بعدين يدوروا وشهم
و بعد ما رجع الجيار حاولنا نصحي الولد تاني و لا هو هنا و لا بسكوت و لا حاجه بتصحيه
كان شكله عايز ينام اوي
و الغريب ان الناس شايفانا بنصحيه و لا حتي حاولوا يشوفوا فيه ايه
رجعت من تاني اكلم الجيار في موضوع اننا لازم نكلم حد من المسئولين عشان احنا مش في ايدينا غير كده
و انا كنت فاكر في التليفزيون مره كنت شفت وزيره مع محمود سعد بتتكلم في موضوع اطفال الشوارع -مش فاكر وزيره ايه بالظبط- بس كانت بتترجي الناس انها لما تشوف اطفال شوارع تتصل بالرقم المجاني 16000 و يستنوا يشوفوا اللي هايحصل و ان المؤسسات علي اعلي مستوي و فاضيه
المهم انا لما افتكرت كل ده قررت ان انا هاتصل و مافيش حاجه ها توقفني و جيت اتصل لاقيت اللي بتقوللي
" عفوا, لقد نفذ رصيدكم"
تبا, هو مش مجاني, اه بس ماهوش طوارئ
..............المهم اخدت موبايل الجيار و اتصلت
***********************
تررررررررررن تررررررررررن
و كان فيه رساله مسجله
الرساله: مرحبا بك في خدمه مش عارف ايه المقدمه من وزاره الاسره و الطفل , اذا اردت الاستعلام عن مش عارف ايه اتصل ب 0900 , و هكذا
و بعدين رد عليا واحد محترم كده زي بتوع خدمه العملاء اللي بيقولوا حضرتك و سيادتك و كده
************************
الجيار: هو محدش بيرد ولا ايه
انا: لأ دا فيه اعلانات
الراجل: مساء الخير, اهلا بحضرتك في مش عارف ايه و ايه و زاره الاسره و الطفل
انا:الو , سلامو عليكوا
الراجل: و عليكم السلام يا فندم , اي خدمه؟
انا: لو سمحت , انا كنت شفت في التليفزيون وزيره بتتكلم عن اطفال الشوارع و اننا نتصل ب 16000 لو لقينا حاجه زي كده
الراجل: بالظبط يا فندم, اقدر اخدم حضرتك ازاي؟
الجيار: انتا بتقول ايه؟
انا: طب انا لقيت طفل في الشارع اهو, فإتصلت
الراجل: طب هو الطفل عنده تقريبا كام سنه؟
انا: عنده حوالي 5 او 6 سنين, و نايم علي رصيف كافيتيريا جنب الهوايه علشان يتدفي من الهوا اللي طالع منها و شكلوا كده بيبيع مناديل او حاجه, جينا نصحيه مش راضي يصحي خالص من التعب,... اه و احنا قدام كوبري ستانلي في اسكندريه
الراجل:طب ممكن اعرف اسم حضرتك؟
انا: اسمي احمد الزكي العباسي
الراجل: تاني كده يا فندم؟
انا: احمد الزكي العباسي, عايز رقم البطاقه!!؟
الراجل: طب هو ده رقم حضرتك اللي ظاهر عندي؟
انا: لأ ده موبايل صاحبي اللي معايا
الراجل: طب ممكن حضرتك تقوللي مكان الطفل فين بالظبط؟
انا: ما قلتلك جنب كوبري ستانلي!!!!!؟
الراجل: انا قصدي المنطقه اسمها ايه؟؟
انا: و انا اش عرفني , انا اساسا مش من اسكندريه, و كمان ده كوبري ستانلي علم , حد ميعرفش مكانه؟؟
الراجل: لأ يا فندم اصل احنا هنا المكتب الرئيسي في القاهره, و محتاجين العنوان عشان نكلم اقرب مؤسسه للطفل عشان توصل بسرعه
انا: اه, طب احنا قدام كوبري ستانلي , جنب فندق دوفيل قدام كافيتيريا زانيلليز
الراجل: طب يا فندم, احنا هنكلم حضرتك بعد شويه
انا: طيب ماشي
********************
و قفل الراجل المكالمه, و انا و الجيار ما كونناش شايفين ان فيه حاجه تانيه ممكن نعملها. و فضلنا نلف حوالين المكان و حوالين الكوبري في انتظار مكالمه الراجل, و طول ما احنا مستنيين ناس تعدي و ناس تدخل و تخرج من الكافيتيريا , اللي يبص عليه, و اللي يعمل انه مش شايفه, و اللي ما ياخدش باله اساسا, و عدي اتنين شباب شافوه و وقفوا يشوفوا ماله, و حاولوا يصحوه و برضه مش راضي يصحي, و اخر ما زهقوا مشوا
و روحنا و جينا و لقينا فيه ناس حواليه قلنا نروح نشوف. كان الاتنين الشباب اياهم رجعوا, و فيه واحده ست و كان فيه واد صغير شكله 10 او 11 سنه
الست كانت بتحاول تصحي سامح, بس كانت بتصحيه بعنف شويه بطريقه تدايق , و ده خلي الناس اللي واقفه تفكر انها تعرفه
كانت بتصحيه و بتقله يقوم عشان يروح معاها , بس كانت بتقولها بطريقه تبان انها بتعمل كده شفقه بيه, مش عشان انها تعرفه, و سامح مش عايز يصحي
اتلم الناس بطريقه خات الناس اللي في مطبخ الكافيتيريا ياخدوا بالهم , فواحد من جوه شاورلي من الشباك بطريقه معناها "هو فيه ايه" , فرديت عليه " تعالي شوف" , شكلهم فكروا فيه حاجه بتحصل مهمه , فخرج لنا راجل محترم لابس بدله من غير كرافته و مليان شويه كده باين عليه الهيبه و شكلوا من اللي بيحلوا المشاكل
خرج الراجل المحترم, و كان فيه جرسون من الكافيتيريا واقف بره فا المحترم سأله هو فيه ايه؟ فالجرسون جاوبه بإنه شاورله علي سامح, فالراجل بص عليه كده و مشي زي مايكون كان خارج لحاجه تانيه بس الموقف شد انتباهه مش اكتر مش لأنه خارج يشوف فيه ايه و ما عدناش شوفناه تاني
و في نفس الوقت كانت الست نجحت في انها تصحي سامح و شدته من ايده عشان تاخده معاها و المفاجئه انه مشي معاها بس كان زي ما يكون مش عايز يروح
في اللحظه دي كلنا خمنا انهم يعرفوا بعض فأحد الشباب سأل الواد الصغير اللي واقف " هو يعرفها" فالواد قال " دي باينها امه" و تقريبا هي اخدت الكلمه علي سدرها اوي و قالت "امه!!!؟ و لا امه ولا اعرفه" و هنا سامح زرجن معاها و مبقاش عايز يمشي فسابته و قالت احسن
و سامح راجع علينا سأله الجيار " تعرفها دي؟؟" قال سامح و هو مبتسم " و لا عمري شفتها" و رجع مكانه و مش هتصدقوا ... نام تاني
زي ما يكون هايموت من التعب
ايه اللي يخلي طفل زي ده في الشارع لحد دلوقتي و عايز ينام بالشكل ده
الواد الصغير شكله كان عارفه, فأحد الشباب سأله " انت تعرفه؟" فقال الواد " اه ده سامح" فسألته هو منين فقاللي انه من المندره
فقلتله:"دي في اخر الدنيا .هو ايه اللي جابه هنا؟" فقال انه بيبيع مناديل و كده بس تقريبا الواد ده طلع ما يعرفش اكتر من كده. و في نفس الوقت جه علينا راجل شكله في الخمسينات و تخين شويه و عنده شنب و اصلعحبه من فوق, زي ما يكون اللمه لفتت نظره
و قال" ماله الواد سامح" و لما لقاه نايم قال طب سيبوه هو هينام شويه و بعدين هيمشي
و انا طول الوقت ده قاعد افكر في المكالمه اللي المفروض انا مستنيها
و فعلا الناس كلها اتفضت و مشوا كلهم و انا و الجيار بعدنا شويه, كنت بفكر يا تري اللي انا عملته صح و لا غلط ان انا كلمت الناس دي
و كان عدي حوالي ربع ساعه من المكالمه و هنا الجيار تليفونه بدأ يرن و رديت بس كان راجل تاني بيكلمني
*********************************
ترررررررررن تررررررررررن
انا: الو, سلامو عليكوا
الراجل: و عليكوم السلام يا فندم, الاستاذ احمدالزكي العباسي؟
انا: ايوه انا
الراجل:حضرتك اتصلت من شويه ب مش عارف مين و قلت عن طفل مش عارف ماله و ايه
انا: ايوه ( و حكيت له الحكايه تاني و الجديد فيها) بس
الراجل: طب ممكن العنوان
انا: كذا كذا كذا
الراجل: طب احنا مسافه السكه و هنكون هناك
********************************
قفل الراجل المكالمه و الجيار قاللي ان خلاص كده احنا عملنا اللي علينا و المفروض نمشي بقي, قلتله لأ احنا هانستني لما نشوف ايه اللي هايحصل زي ما الوزيره كانت بتقول علشان نتأكد انهم هايعملوا اللازم
و فضلت انا و الجيار نلف تاني حوالين الكوبري و نتصور حبه و نقعد حبه و نمشي حبه لغايه اما الساعه عدت 12
الجيار بقي غايز يروح بحجه ان مالوش لازمه القعاد و كمان ان دي الحكومه و المفروض ما نستناش ان حاجه هتحصل لأن مافيش حاجه هتحصل و انا عايز استني بحجه انهم بني ادمين برضه الحكومه دول و اكيد عندهم قلب في حته ما و هيحنوا علي الواد الصغير ده
و فضلنا نتناقش لحد ما عدت اكتر من نص ساعه علي اخر مكالمه و مفيش حاجه بتحصل برضه
اخدت الموبايل من الجيار و اتصلت بالرقم اللي اتصل بيا من اسكندريه و بعد ما سمعت الاعلانات
*********************************
ترررررررن ترررررررررن
الرساله: مرحبا بك في خدمه مش عارف ايه المقدمه من وزاره الاسره و الطفل , اذا اردت الاستعلام عن مش عارف ايه اتصل ب 0900
انا: الو سلامو عليكوا
(الراجل : و عليكم السلام هنا مش عارف ايه تبع وزاره ال..... (و انا قاطعته
انا: لو سمحت, انا اتصلت من تلتتربع ساعه علي مكتب القاهره عشان كذا كذا و اتصل بيا مكتب اسكنريه من اكتر من نص ساعه و قالوا انهم جايين بس لحد الوقت لسه ماحدش جه؟
الراجل سكت ثواني و قال: لأ يا فندم ده هما علي وشك الوصول
انا: هما جايين منين بالظبط؟
الراجل: من مؤسسه في محطه مصر
انا: من محطه مصر ل كوبري ستانلي الساعه 12 باليل و لسه ما وصلوش من اكتر من نص ساعه؟؟؟
الراجل: لا يا فندم دا هما قربوا يوصلوا خلاص
(انا: طيب (و قفلت السكه
الجيار هما شكلهم جايين من محطه مصر اللي في القاهره
انا: باين كده
*******************************
اقتنعت برأي الجيار و روحنا سوا من غير ما نعرف ايه نتيجه اللي عملناه
و لحد النهارده انا ما اعرفش ايه اللي حصل, و برضه مش متأكد بالظبط هاتفرق معايا في ايه , بس ده طرح تساؤلات كتير اوي انا يمكن ما كنتش مديها اولويه قبل كده زي ازاي ده يحصل في بلد مسلمين؟, و لا حتي ازاي يحصل وسط بني ادمين ان طفل في السن ده يبقي مشرد و ما حدش حتي مكلف نفسه يبص عليه؟ و لاهو سامح ده او غيره من الاطفال اللي زيه و اللي هما كتير و انا ما شفتش الكم ده الا لما خرجت من دمياط سواء في القاهره او اسكندريه, هل الاطفال دول اهلهم هما اللي عاملين فيهم كده؟ طب ازاي جالهم قلب بسيبوا اولادهم في البرد يتدفوا بهوا خارج من مطعم ولا غيره؟ طب و ان كانوا ايتام ازاي المجتمع( اللي هما احنا) يسمح بإن ده يحصل و يظهر هذا الكم من ال لا مبالاه بالأطفال دول
طبعا انا مش عارف بالظبط ايه اللي المفروض يتعمل لو لقيت حاله من دي في الشارع ولا حتي عارف اسمع من مين اعمل ايه
و طبعا فيه اللي هايقول يا عم مش اما نلاقي ناكل احنا الاول نبقا نشوف العيال المشرده في الشارع

انا مش بكتب الحكايه اللي حصلت دي عشان اقول ان المفروض نعمل كذا او نعمل زي ما انا عملت, بس هي دعوه للتفكر و المفروض الواحد يفكر هايعمل ايه .... هيعدي ولا كإنه شاف حاجه و لا هايقف يتفرج زينا كده و لا لو ما كانش في ايده حاجه يعملها يشوف حد في ايده انه يغير الوضع و يقوله
و طبعا ده ينطبق علي حاجات كتير بنشوفها و بنعديها ولا كإننا شايفين حاجه بس مش مكانها هنا
اتمني انكوا تكونوا استفدتوا من الحكايه دي و تخليكوا تفكروا صح

انتهت