Thursday, August 12, 2010

خرافات , خزعبلات و اختراعات

من كام يوم كنت قاعد مع اتنين اصحابي في الشقه بنتفرج علي التليفزيون و كان فيلم اجنبي شغال, و كالعاده في اخر اي فيلم البطل بيقتل الشرير و في الفيلم ده كان البطل في اخر الفيلم ضرب الراجل الوحش بالرصاص و الراجل الوحش اتزحلق و وقع من فوق سطح العماره, و كانت عاليه اوي
انا طبعا كل اما اشوف منظر زي ده دماغي تبدأ تشتغل , وهنا غلط غلطه عمري و سألت اصحابي: يا تري بالمعلومات اللي عندنا دي نقدر نحسب زمن وقوع الراجل لحد الارض.....؟
انا دايما بسأل اسئله من النوعيه دي ﻷنها بصراحه بتؤرقني, و دايما ردود الافعال بتبقي متوقعه, اذا كان الناس اللي سألتهم في هندسه بنقعد نتناقش في الموضوع, غير كده بسمع تعليقات و تريقه و لكن المره دي كان الاتنين في هندسه و معايا في اخر سنه و هما الاتنين قسم اتصالات....... و اللي حصل كالاتي
انا كنت مقنتنع ان ممكن نخمن شويه معطيات و بإسيخدام قوانين الحركه ممكن نجيب الزمن , و ب ده انا كان قصدي من قانون الحركه التاني ان المسافه = 0.5 * العجله * الزمن^2
و لو خمنا ان المبني كان 20 دور و الدور 3 متر ممكن نحسب الزمن , بس اللي اكتشفته ان انا بس اللي مفكر كده و ان الاتنين كان رأيهم ان مش هنعرف نحسبها و مش ﻷن المعطيات مش دقيقه ﻷ بس ﻷن المعطيات مش موجوده و كان قصدهم مقاومه الرياح
انا حسبت زي ما علمونا في المدرسه نهمل الحاجات دي و ساعتها اتكسفت اكمل ﻷني مش دقيق زيهم اوي بس واحد منهم غلط و قال ان الحسابات هتختلف من جسم لجسم عشان مقاومه الهواء قلتلهم خلاص يا رجاله انا كنت اهملت المقاومه دي, بس اتضح من تكملت الكلام ان هما الاتنين مقتنعين ان الحسابات هتختلف حتي لو مافيش هوا
قلتلهم ازاي بقي.. ازاي, ده انا لو برمي ريشه و كيلو حديد الحديد هيوصل اسرع عشان مقاومه الهوا له ضعيفه و الريشه هتطول اوي عشان مقاومه الهوا لها عاليه, بس لو عملت نفس التجربه في جو مافيهوش هوا (و قلتلهم علي التجارب اللي اتعملت علي القمر و قبلها علي التجارب اللي كانت في الانابيب المفرغه اللي كان اساتذه الفيزياء بيحكولنا عليها) هتكون النتيجه ان الريشه و الحديد يوصلوا مع بعض
قالي واحد منهم -و التاني اتفق معاه- ان قوانون نيوتن اللي بيقول القوه = الكتله في العجله يخلي الحديد يوصل اسرع ﻷن كتلته اكبر حتي لو مافيش مقاومه
هنا اتأكدت ان التعليم الحكومي فشل مع بعض الناس
قولتلهم تاني علي التجارب اللي اتعملت علي القمر لحد اما افكر في القانون اللي قالوهولي لاقيت واحد منهم بيقوللي-و التاني متفق معاه- ان القمر اساسا ما عليهوش جاذبيه بدليل ان مافيش غلاف جوي و ان رواد الفضاء بيبقوا طايرين عليه و كمان كانوا متفقين ان العلماء لحد دلوقتي مش عارفين سر هروب غازات الهيلوم و الهيدروجين من الارض
...............................
؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟
؟؟؟؟؟؟؟؟
؟؟؟
؟
انا حسيت ان انا كنت بتعلم حاجه, و الناس التانيه كانت بتتعلم حاجه تانيه خالص
ازاي القمر ما عليهوش جاذبيه ازاي يعني انا مش فاهم؟؟؟؟
المهم, الالهام جه من عند ربنا و رديت عليهم بالاتي
بعد بعض التعبيرات الشفويه الخارجه عن ارادتي لمجرد انهم في رابعه هندسه و مش عارفي الحاجات دي رديت بما معناه الآتي
أولا القوه المؤثره علي الجسم الواحد بتأثر علي سرعته في حاله ان القوه دي اتغيرت و ده علشان بتغير العجله بتاعت الجسم, بس في حاله سقوط الاجسام بتكون العجله لجميع الاجسام ثابته, يعني التسارع"الزياده في السرعه " بتكون متساويه للأجسام كلها و ده معناه ان كانت السرعه الابتدائيه للجسمين متساويه زي حاله سقوط الاجسام من الثبات اللي عندنا هنا هتكون سرعه الأجسام عند اي لحظه متساويه و بالتالي الزمن هيكون متساوي, اما بالنسبه للريشه و الحديد فالريشه بتاخد زمن اكتر عشان مساحه السطح المعرضه لمقاومه الهوا اكبر و بالتالي بتبقي قوه مقاومه الهوا للريشه اكبر و بتقلل العجله اللي بتتحرك بيها و ده ما يحصلش في جو زي القمر عشان مافيهوش غلاف جوي, و ده مش كلامي , ده كلام عم جاليليو اللي قالوا من زمان اوي و علي فكره التجربه ممكن تشوفوها علي اليوتيوب اللي كانت في اول رحله للقمر
ثانيا بقي ازاي القمر ما عليهوش جاذبيه؟؟؟؟
ده اي جسم في الكون له جاذبيه, ده انا و انتم لينا جاذبيه بس هي بس اللي ضعيفه شويه و الكلام ده برضه مش جايبه من بيتنا, ده كلام عم نيوتن اللي قال في قانون الجذب ان قوه الجذب بين جسمين تتناسب طرديا مع حاصل ضرب الكتلتين, و تتناسب عكسيا مع مربع المسافه بينهم, و عشان كده رواد الفضاء بيتنططوا علي القمر ﻷن قوه الجاذبيه بين القمر و اجسامهم اقل من قوه الجاذبيه بين الارض و اجسامهم ﻷن كتله القمر اقل من كتله الارض, و ده يثبت ان فيه جاذبيه علي القمر و هي اقل من جاذبيه الارض)يثبتلي انا علي الاقل( اما بقي ليه مافيش هيليوم او هيدروجين علي الارض و لا غلاف جوي علي القمر )علي فكره فيه هيلوم و هيدروحين علي الارض بس ناتجه من تفاعلات اشعاعيه"مش موضوعنا" ( بس السبب هو ان الغازات دي خفيفه اولا فقوه الجاذبيه بينهم و الارض ضعيفه ,وبالتالي بيقدروا يوصلوا لسرعه الهروب من الجاذبيه "زي الصواريخ" و يقدروا يسيبوا غلاف الارض, ونفس الكلام علي القمر , بس جاذبيه القمر اضعف من جاذبيه الارض و عليه فمفيش عليه غلاف جوي
تيجي بعد كده و تقوللي يا عباسي لما حد يقع في التليفزيون بعد كده ابقي اتكتم و لا تعلق علي اي حاجه تاني, بس كانت النتيجه ان واحد منهم راح ينام و التاني راح يقعد علي الكمبيوتر بتاعه, و سابوني انا و التليفزيون
***********************************
بعد التجربه اللي فاتت دي بكام يوم كنا رايحين القريه الذكيه عشان نحضر ال اي اي دي او يوم الهندسه المصري, سيبكوا من الرحله نفسها , المهم اللي شوفتوا هناك. انا شفت هناك حاجات حلوه جدا حسستني اننا مهندس )رغم اني مش حاسس اني استاهلها اوي لسه( و شفت هناك مشاريع تخرج غايه في الروعه, و مشاريع تانيه غايه في التفاهه و ضعف التفكير
خلينا نبدأ بالوحش و نحلي في اﻷخر ... شال وي
اول مشروع ما عجبنيش كان عامله بنتين من جامعه حلوان)الغريب في جامعه حلوان ان اغلب الطلبه, ان ما كانش كلهم شغالين لينكس و برامج مفتوحه المصدر "اوبن سورس"(بس المشروع بكل بساطه كان برنامج كمبيوتر بيعمل فلتر للباكتس اللي داخله علي الكمبيوتر و بيشيل منها ال فويب باكتس, يعني من الاخر برنامج بيشوف المعلومات اللي داخله للجهاز من علي النت عن طريق الكابل الابيض اللي انت اخده من السيبر او الويرليس اللي انتا اخده برضه من السيبر و يشوف ياتري انتا بتعمل شات بالصوت او صوت و صوره"فيديو يعني" و يلغي المعلومات دي
يعني من الاخر و علي بلاطه مش هتعرف تعمل شات بال مايك او بال كاميرا
؟؟؟؟؟؟؟!!!!!!!!!
!!!!!!!!؟؟؟؟؟
؟؟؟؟!!!!!
!!؟؟
؟!
!
ليه با بنتي انتي و هي الاذيه دي؟؟ يعني ده مثلا فيرس او حاجه زي مراقبه ابويه؟؟؟
قالتلي ﻷ, بس قالتلي ان اساسا مجرد اننا بنعمل الحاجات دي ف ده غير قانوني ﻷن المصريه للاتصالات المفروض ندفعلها فلوس مقابل خدمه زي دي, بس احنا "الشعب الوحش" بنستخدم الخدمه دي من غير فلوس عن طريق سكايبي و ياهو و جوجل بس المفروض ندفع
قلتلها يا بنت الناس ما هي الخدمه دي مجانيه في كل حته في العالم!! اشمعنا عندنا اللي خلوها بفلوس؟ و كمان ما انا بدفع فلوس مقابل النت ل تي داتا ؟؟ يعني هما موافقين انا انزل افلام من علي النت زي منا عايز"اصلي عندي خط غير محدود" بس ما اعملش شات مع حد!!! ده مش منطقي؟؟؟
قالتلي ان ده مش قانوني, قولتلها طب الناس استفادت ايه من البرنامج بتاعك ده؟؟ قالتلي البرنامج ده احنا عاملينه ل المصريه للاتصالات عشان يحطوه علي السيرفر بتاعهم و بكده الناس هتضطر تدفعلهم مقابل الخدمه
!!!
لا تعليق
******************************************************
مشروع تاني كان شويه شباب من جامعه المنصوره عاملين خرايط ب ال جي بي اس, بس الجديد انهم هما اللي عاملين الخرايط بإديهم , راحوا مجلس المدينه و اخدوا الخرايط و رسموها علي الكمبيوتر و تقدر تستخدمها من علي الموبايل بس للمنصوره بس, الغريبه انها حاجه عملتها جوجل و ياهو و ميكروسوفت بس الناس دي زي ما قالي واحد هناك "دونت ري انفنت ذا وييل" يعني لا تعد اختراع العجله.ء
الناس دي عملت حاجه معموله قبل كده بطريقه اصعب و ما اضافوش جديد و المرونه اللي اضافوها تقريبا ما حدش ها يستخدمها و ده ﻷنك ممكن لو تعبت نفسك شويه مع خرايط جوجل ممكن تحل المشاكل دي بس تقول ايه!! ء
******************************************************
كان فيه برضه شويه لبخ كتير و اغلبه عن ال جي بي اس زي ما يكون موضه مشاريع السوفت وير, تقريبا اغلبهم كان فيه جي بي اس , و برضه لقيت ناس كتير داخله في حاجات غير تخصصها, و انا حاسس ان ده تضييع للعلم اللي اتعلمه. ايا كان كفايه عن المشاريع الوحشه و خلينا في الحلوه
******************************************************
كان فيه مشروع ﻷحد الناس "و علي فكره كانت احلي المشاريع من جامعه القاهره, و الغريب ان الكليه بتاعتي مجاش منها الا مشروع واحد)او علي الاقل ده اللي انا شفته( و كان مشروع زي بحث علمي , اللي مالوش في الكمبيوتر اوي يمكن ما يفهموش بس اللي اكتشفته ان اغلب المشاريع في كل الجامعات التانيه لها ممولين الا جامعه اسكندريه و ده عشان بشوف اللي بيحصل عندنا في الكليه و تقريبا اللي بيجيبوهم هما الدكاتره" ء
المهم, المشروع بتاع الراجل ده كان عباره عن نضاره متركب عليها كاميرا يلبسها الشخص الكفيف و بيوصل الكاميرا بالعصب البصري للكفيف فيقدر يشوف)هي صحيح هيشوف ابيض و اسود بس : نص العمى و لا العمى كله " حرفيا" ( و ورانا الكفيف هيشوف صوره عامله ازاي و الناس فرمته اسئله بس كانت اجاباته كويسه و علي قد السؤال
صحيح الفكره دي معموله قبل كده بس اما تشوفها معموله في مصر بتديك نوع من الامل ان فيه فرصه لمصر انها تطلع من القاع اللي هي فيه دلوقتي و ان بكره فعلا ممكن يبقي احسن لو احنا فعلا فكرنا صح و اتحطينا "او حطينا نفسنا" علي الطريق الصح
بس اللي دايقني في الموضوع ان الراجل اللي عمله كان بيتكلم علي اساس ان ده مجرد مشروع تخرج و ان الناس اللي طالعين سنه رابعه السنه الجايه هما اللي هيكملوه زي ما هو اخده من الدفعه اللي قبله و حِسنه, انا كنت متخيل ان الواحد ممكن يكون عنده طموح اكبر من كده و يستفيد بمشروع تخرجه او يكمل فيه , مش يخلصه عشان يحطه في السي في و يلاقي شغل في شركه و خلاص زيه زي الناس كلها
ايا كان...... كل يغني علي ليلاه
*********************************************************
واحده تانيه كانت عامله نضاره ثلاثيه الابعاد المفروض انها بتتوصل بكمبيوتر و بتلبسها و بتحس انك جوه مبني ثلاثي الابعاد و تقدر تتحرك جواه و كأنك موجود فيه "و علي فكره انا جربت النضاره دي و هي فعلا سوبر كوول" و دي حاجه ممكن طبعا تستخدم في الالعاب بس هي كانت عامله برنامج تحط فيه التصميم بتاع بيتك او شقتك و هي فاضيه و بعدين و انتا لابس النضاره بالبرنامج برضه ممكن تحط اثاث لبيتك و تشوف شكله ممكن يبقي عامل ازاي قبل ما تحط فيه حاجه
طبعا فكره حلوه و عمليه و كووول
********************************************************
و كان فيه مجموعه بنات تانيين عاملين تقريبا نفس فكره المشروع اللي انا كنت عايز اعملها بس هما عملوهارد وير, بس انا كنت عايز اعملها سوفت وير بس ما كنتش متأكد بالظبط المفروض اعمل فيها ايه, و طبعا فرمتهم اسئله, تقريبا فضلت واقف معاهم نص ساعه لغايه اما عرفت كل تفصيل منهم بس هما كانوا من جامعه المنوفيه
*******************************************************
طبعا انا كالعاده مش جاي اكتب حواديت هنا , انا جاي بوريكم جزء من الواقع. ء
و هي دي مصر و الناس دي هيا اللي هتمسك مصر في ال40 سنه الجايه من اول اللي بيقول مافيش جاذبيه علي القمر لحد اللي عمل النضاره اللي بتخلي الكفيف يشوف ....... و عجبي