بعد فتره غير قصيره من الجمود الفكري قررنا نحن احمد العباسي و "شركاه" )دماغي 1 و دماغي -1( ان نعيد النظر في موضوع البلوج, و ده ﻷني كنت قد قررت في وقت ما لسبب ما اني ماعنتش اكتب حاجه بس بناءا علي رغبه المشاهدين التلاته اللي بيتابعوا هيكون في جديد ان شاء الله
طبعا انا ماكنتش لاقي حاجه اتكلم عنها و عليه فقررت اتكلم عن حاجات كتير و اولها البلوج ده
انا بصراحه اول ما عملت البلوج ما كنتش عارف هكتب فيه ايه و مش كده و بس ﻷ بس طريقه تفكيري "اللي فرضتها علي نفسي" و هي اني مش هاعمل حاجه مش حاسس ان لها لازمه اثرت فيا, و مش كده و بس ﻷ, و كمان انا ما بحبش اعمل حاجه بصراحه من غير لما اخطط لها, يعني مثلا لو هنزل اجيب طلبات البيت لازم اتخيل الطريق اللي همشي فيه و هعدي علي بتاع الخضارالاول و لا البقال "و ده طبعا علي اساس هجيب حجات اتقل من مين" و طبعا لازم اختار اقصر طريق و مش كده و بس ﻷ و ممكن كمان ألغي حاجات من اللي هاجبها عشان ممكن تبوظ الخطه او تبطئها)لاحظ ان كل ده لسه تخيلات و لسه منزلتش من البيت(, اكيد فيه ناس دلوقتي بتقول عادي ما كل الناس كده , و الناس دي احب اقولها ان انا اكتشفت ان الطريقه دي مش نافعه معايا, و بتخليني افكر كتير في تفاصيل ملهاش لازم, و علي فكره ده بس مثال , و كمان انا لقيت ان انا بحاول بالخطط دي اوفر وقت انا عندي منه كتير و بضيعه كده كده في حجات ملهاش لازمه, و بوفر مجهود انا محتاج ابذله عشان علي الاقل اتحرك من علي السرير اللي انا قاعد عليه و انا نايم و انا صاحي, و لو نزلت بنزل انام علي الكنبه
طبعا انا مش بقول ان التخطيط وحش بس انا بس اللي يمكن ما نفعنيش اوي و يمكن ده غلطه مني او انا يمكن بخطط غلط
و لكن من قراءاتي المتواضعه لقيت ان الخطط الطويله)اللي انا عايش عليها( قلما تنجح و ان الاحسن ان الواحد يخطط خطط صغيره علي مدي قريب عشان دي بتبقي اسهل في التنفيذ و اقل تعقيدا في التخطيط و كمان الواحد لما تنجح معاه الخطط دي او اغلبها و يحقق الهدف منها هيحس انه فعلا عمل حاجه و انه حقق هدف و ان كان صغير
**********************************
الناس اللي بتدايقني
=========
نيجي لنقطه تانيه و هي الناس اللي بتضايقني, و هما كتير جدا و اكترهم الدكاتره اللي ما بتعرفش تشرح
انا فاكر و انا في اعدادي عندسه كان الواحد عنده اختيارات كتير من الدكاتره وفيه منهم اللي كان و اللي مكانش بيعرف يشرح, بس رنت في دماغي كلمه قالهالنا دكتور الرسم الهندسي و هي ان الدكتور اللي يلاقي انه مش عارف يشرح او بمعني ادق الطلبه مش بتفهم منه, او بمعني اكثر دقه ان الطلبه ما بتحضرلوش المفروض يبطل تدريس اكرمله
طبعا انا ما كانش عندي مشكله مع الدكاتره نفسهم, بالعكس انا كنت و لازلت مقتنع اني لو حضرت محاضره كامله و مفهمتش الا جمله واحده او حتي كلمه يبقي انا استفدت اكتر من لو ما حضرتش, بس انا ما كنتش بطبق ده مؤخرا للاسف
اللي بيضايقني هو اني بقعد طول المحاضره اتخيل لو الراجل ده بيعرف يشرح كان حيبقي الحال ازاي, و لو صدف و فهمت حاجه فلته و انا عارف ان ناس كتير ما فهمتهاش بقعد افكر في الطريقه المناسبه اللي الدكتور ده كان ممكن يشرح بيها الجزئيه دي
زي مثلا الفيزياء الحديثه اللي درسناها في سنه اولي و ما حدش كان فاهم فيها حاجه, ﻷ و المفاجئه ان المعيد يعترف انه هو كمان مش فاهم فيها حاجه رغم ان ده ما منعوش يجيب فيها امتياز "و دي نقطه يمكن اتكلم فيها دلوقتي" ﻷ و مش كده و بس ﻷ كمان ممكن يكون الدكاتره اللي بيشرحوها مش فاهمينها "انا مش بقول انها كانت سهله", احمد زويل نفسه قال انه كان مسافر امريكا و هناك رغم انه نجح فيها اللا انه اكتشف بعدها انه مش فاهمها
بس بعد كده لما قرأت كتاب
a brief history of time
لستيفين هوكنز لقيت الراجل شارح نفس اللي احنا درسناه بطريقه منطقيه و بتسلسل منطقي يخليك تفهم العلماء فكروا في كده ليه
و طبعا مش معني كده برضه ان انا فاهم النظريه النسبيه بس علي الاقل فاهم الدنيا ماشيه ازاي
و ارجع تاني و اقول ان كل ده غلطه مني ﻷني انا اللي بقعد افكر كتير و احاول اتخيل الدنيا بشكل اسهل
و حاجه تنيه عايز اتكلم عنها و هي في الكليه برضه و هي الدرجات, انا عمري تقريبا ما فكرت في الدرجات دي و كنت سايبها دايما بالبركه و لكنني فوجئت اكتر من مره انني الاقي ناس بتنقل حلول الشيتات عيني عينك كده في الكليهﻷ و مش كده و بس و بينقلوا كود من بعض , و ياريتها علي كده و بس ﻷ و وصلت البجاحه من بعض الناس في الكليه انهم يقولوا لدكتوره عندنا انهم بيضطروا يغشوا عشان مش هيلحقوا يحلوا كل حاجه ﻷن اللود عليهم عالي, انا كنت يوميها صعقت و قلت للدكتوره انهم قله قليله و لا يعبروا عن الدفعه, بس اتضحلي بعد كده انهم مش قله قليله و انهم بيعبروا عن اكتر الدفعه "طبعا في الدفعه ناس محترمه كتير بس تقول ايه بقي" و الدكتوره كانت ردت بكلمه رنت في
دماغي و هي ان لما الدفعه تغش و يبان للدكتور ان مستواهم اعلي مما هو عليه اكيد هيفكر انهم كويسين و يزود اللود عليهم
ﻷ و مش كده و بس ﻷ تيجي واحده معانا في الدفعه ما اعرفش هي مين "انا ما اعرفش اسماء اغلب البنات اللي معايا في الدفعه" بعتت ايميل للمعيد عشان تقريبا يأخر معاد تسليم مشروع و بتتحجج ان لما ال لود بيبقي عالي الناس "بتضطر" تغش من بعض و مش بس كده ﻷ ده اللي يحرق الدم ان المعيد يبعت يقولها فيما معناه ان كلامها منطقي و ان عندها حق "في الغش" و وافق علي التأجيل
و الاقي واحد بعد كده يقوللي "يا عم, جمع درجات" و انا اقول ان لو بالحرام مش عايزها, بس يا تري اللي بيغش عارف انه درجاته كده حرام و ان ممكن تتردله في حاجه تانيه اهم بالنسبه له تضيع منه؟
انا عمري ما نقلت شيت و عمري ما كتبت سطر كود مش فاهمه حتي لو قعدت يوم كامل عشان افهمه
انا رايح الكليه افهم مش اجمع درجات,و مش بقول ان الدرجات مش حلوه لا سمح الله بس لنل مقتنع بحاجه من زمان و هي لو الدرجات هتيجي علي حساب اني افهم فا انا مش عايزها
انا لو ما فهمتش في الكليه, هافهم امتي؟ لما اتخرج!؟
--------------
نخرج بقي من جو الكليه اللي شكله مضايقني اوي ده و نخرج للحياه العاديه
انا حصل معايا موقف غريب شويه قد يكون محرج بس انا مش فارقه معايا و لعل حد يستفيد حاجه
انا من اكتر من اربع سنين و انا بسافر لوحدي للقاهره او اسكندريه و كالعاده بعمل حساب لكل الاحتمالات و اخطط لها و في الاربع سنين دايما باعمل حساب موقف ممكن يحصل بس عمره ما حصل, و يشاء السميع العليم اني اكون مسافر من اسكندريه للقاهره بعد الامتحانات عشان احضر مؤتمر من المؤتمرات المحترمه اللي بيبقي فيها اجانب و بيبقي فيها غداء ): و كده يعني, و انا كان المؤتمر كله حلو بس انا كان كل همي احضر اخر ندوه فيه و فضلت اشرب قهوه عشان افضل صاحيلها, و فيها كان اكتر الناس مشوا و كنت متشوق ليها اوي و بعد ما بدأت ب 5 دقايق قررت احط رجل علي رجل و طك
كان من حسن حظي اني كنت قاعد في صف لوحدي و ماحدش خد باله بس انا فضلت طول المحاضره دي مرتبك و مش عارف اعمل ايه و طبعا ما كنتش مركز في اللي بيتقال خالص و انا في بلد غريبه و لسه ورايا سفر
طبعا اول حاجه جت في بالي هي المثل اللي بيقول"البلد الي ما يعرفكش حد فيها , .... و اجري فيها" طبعا فكرت اني ها اضطر اطبق المثل حرفيا, بس و الحمد لله بعد ما خرجت اكتشفت انها مش باينه خالص و لما رجعت اسكندريه بعد مغامره في المواصلات مش وقتها دلوقتي قدرت اني اخيط البنطلون , اللي حصل بعد كده انه اتقطع تاني يوم علي طول"يظهر ان نيتي وحشه"ه
طبعا انا عمري ما عملت اعتبار للاحتمالات بس دايما بعمل حساب للاحصائيات اللي بتعتمد علي الاحتمالات بس المره الوحيده اللي اسافر فرداني من غير احتياطات او لبس اضافي يحصل كده
و ياريت كل واحد يحاول يستنتج مع نفسه المفروض يتعلم من الحكايه دي ايه, و ما تقوليش "دايما اخد معايا هدوم احتياطي و انا مسافر" ﻷن كده تبقي اكيد ما فهمتش حاجه
---------------
بعد اللي حصل ده بكام يوم كان عندي تسليم مشروع قواعد بيانات و ولا واحد من ال3 اللي معايا كان بييجي و انا ما كنتش مصطب البرنامج عندي و لاقيت صاحب الشقه طابب عليا عايز يشوف الشقه قبل ما اسلمهاله, و كنت لوحدي ﻷن كل اللي كانوا ساكنيين معايا خلصوا و سافروا و لبسوهالي
كنا يوم جمعه و كنت صاحي مصدع كالعاده و لما نزلت اصلي الجمعه لقيت مرات البواب بتقوللي ان صاحب الشقه جه و ساب شنطته عندها و انه هيبات معايا انهارده, قولتلها مافيش مشكله
بعد الصلاه طلع معايا و شاف الشقه و كانت متبهدله شويه و هو ما سابنيش, ﻷ ده طلع فيها القطط الفاطسه
و انا كنت قررت اني اخلي مرات البواب تنضف الشقه يوم السبت و انا بسلم المشروع عشان اولا مش عايز ابقي قاعد في الشقه و فيها ستات مش محارم و مرات البواب ثقه يعني, مش هخاف علي حاجه منها و لا من اللي معاها, و ثانيا انا مش فاضي قبل كده عشان المشروع
لكن صاحب الشقه كبرت في دماغه ان الشقه لازم تنضف يومها و هتعرفوا ليه دلوقتي, و نزل جاب ستات مش عارف جابهم منين عشان ينضفوا الشقه, و رغم انهم ستات كبار عني الا ان اكتر حاجه لاحظتها ان ما عندهمش ريحه الحياء
و لما لقيت الوضع كده قلت مابدهاش, انا امشي اروح اشوف حد من اصحابي اقعد عنده لغايه اما يخلصوا
و فعلا كنت هروح عند كريم عشان هما بيعملوا المشروع و قالولي تعالى اتفرج
و بعد مغامرات في السكه, و ذهابي الى سان ستيفانو قبل ما اروح عندهم "لسبب ما" و صلت عندهم و كانوا كل واحد قدام الاب توب بتاعه لما بيلعب او بيتفرج علي فيلم, و كان و انا في سان ستيفانو جالي تليفون من المتابع الوحيد للبلوج ان المشروع اتأجل ليوم الاثنين
انا مش متدايق عشان هما اجلوا المشروع ﻷن ده بيدينا فرصه اكتر اننا نشتغل, بس لازم يعملوا اعتبار ان فيه ناس من بره البلد عايزين يروحوا بيوتهم, و ان المصاريف اللي بيصرفوها في الصيف بتبقي مضاعفه بس تقول ايه بقي
المهم مفيش حد كان عايز يشتغل و انا كان عندي صداع فقررت اروح, و كان سلام هييجي بعدي بشويه"كان قاعد معايا اليومين دول" و فعلا روحت و لاقيت مرات البواب بتقوللي ان صاحب الشقه و ابنه كمان هيباتوا معانا, قولتلها زياده الخير خيرين و طلعت نمت
الساعه 10:30 دق الباب و صحاني من النوم و كالعاده الصداع ما راحش لاقيت صاحب الشقه داخل و قعد يتكلم معايا, و قولت له نتحاسب بقي و كل واحد يشوف اللي ليه و اللي عليه عشان التأمين, و جاله تليفون
كانت تقريبا مراته و استشفيت انها بتقوله ان فيه حد وصل خلاص, فلقيته خرج للبلكونه و بيقول "اطلعوا.. اه الدور الرابع" وبس
رجع و لاقيته بيقوللي معلش ان فيه ناس قرايبه جايين يحضروا فرح بكره و جايين يباتوا معانا في الشقه, و كان بيتكلم كأن الموضوع عادي كده و ان مفيش اي مشكله و لا ان حتي لي الحق اني اعترض
انا بصراحه لما ببقي مصدع ببقي بييس و ما بتفرقش معايا خالص, ﻷ وبضحك علي اي حاجه و من ضمنها الحاجات دي ضحك هيستيري
المهم الاقي قرايبوا دول مين....؟
ابنه و مرات ابنه و حفيده و اخته و جوزها و بنتها الشابه اللي تقريبا في سني و اخت مراته و جوزها و بنتهم الصغيره و كل دول المفروض هيباتوا في الشقه معايا انا و سلام
انا فوجئت بالمنظر في الصالون و لم تساعدني الكلمات فسكت
طلبت سلام و قولت له يرن عليا لما يوصل قبل ما يطلع عشان احكيله اللي حصل ده
هنا انا طبعا فهمت ليه هو الراجل كان مستعجل علي تنضيف الشقه, و انا مش عارف لحد انهارده الضيوف دول كلهم كانوا جزء من خططه لاخراجي من الشقه ولا ﻷ مع العلم اني كنت هاسيبهالوا قبل المعاد ب 4 ابام, و اليوم هناك يعني في المصيف بيتأجر بشئ و شويات بس هو شكله كان مستعجل علي اليومين اللي انا لسه هقعدهم
و جه سلام و حكيتله و فضل يضحك و طلعنا و قعدنا مع الراجل عشان نتحاسب
انا ما عنديش اعتراض ان الراجل يحاسبني بالتعريفه زي ما عمل"اصله قرأ عداد النور و اخر و صل دفعناه و طرح القراءتين و حاسبني علي 16 قرش علي الكيلو وات" ﻷ بالعكس ده انا شايف ان ده من حقه
لكن اذا كان هايعمل كده يبقي لازم يتوقع المثل, و لكن بعد جدال انا كنت مش عايز اعمله و لا عايز اتخانق مع حد و انا عندي صداع وصلنا انه هايدفعلنا 56% من قيمه التأمين الاساسي و انا كنت قررت امشي تاني يوم الصبح انا و سلام بدل من بعدها بيومين ﻷني كنت خلاص قررت ما اعملش المشروع اللي اتأجل و اروح بيتي احسن و انا و حظي بقي في الدرجات
و حبست نفسي انا و سلام في الاوضه و مخرجناش منها الا تاني يوم عشام الفرح اللي كان بره
و فعلا تاني يوم سافرت, بعد الضربه الموجعه علي قفايا من صاحب الشقه لكن محدش بيتعلم بالساهل
طبعا بالنسبه للدرجات انا ما كنتش متوقع اني انجح السنه دي لكن يشاء السميع العليم اني انجح و اعدي بعد ما كانت كل خططي معتمده علي انني هاعيد السنه بس انا حاسس ان ده له علاقه بالدعاء اللي انا بدعوه, انا بطلت ادعي ربنا بحاجات محدده بل بالعكس بقيت بدعي بحاجات مبهمه جدا و ما بقولش غير "يا رب اهديني و وفقني للي فيه خير ليا" بس و عليه فأنا مقتنع ان اللي بيحصلي في الكليه و براها ده هو الخيرليا و الحمد لله علي ذلك
-----------------------
دز شي فت ذا بروفايل؟
-----------------------
استحاله لما واحد يدور علي الفتاه المثاليه انه يلاقيها فعلا مثاليه, بل بالعكس ده لو لقاها مثاليه هيفضل يدور علي اي عيوب فيها عشان علي الاقل ما يحسش بالنقص او يأكد اللي هو مقتنع بيه و لكن ان الواحد فعلا لقي الفتاه المثاليه"لاحظ انا ماقلتش اللي بيحلم بيها" يبقي هنياله, بس ان لقي غير كده فالمفروض الواحد يقدر مميزات الانسان\ه اللي اختاره\ا و ما ياخدش المميزات دي كأمر مسلم بيه و في نفس الوقت يتغاضي عن العيوب و يحاول ان يتأقلم معاها "مع العلم ان كتير من العيوب تعتبر عيوب نسبيه يعني مش كل الناس بتعتبرها عيوب" و يحاول يصلح من نفسه و يغير فيها عشان الانسان\ه اللي بيحبه\ا
----------------------
برضه من الحاجات اللي بتضايقني جدا اني اطلع اقف في البلكونه و الاقي واحده واقفه زي متكون مش واخده بالها ان في ناس شايفينها و ان اللي هي لابساه ده ما يصحش قدام الناس , و نفس الكلام في الشارع بس نعمل ايه بقي, ما فيش غير اننا معشر الشباب نقول "لنا الله" و نتخيل ان البنات \الستات دول مش عارفين تأثير اللي هن بيعملوه ده و انه بيضر المجتمع ككل و ان ده بيترد عليهم في الاخر
---------------------
النيش
----
من الحاجات المنتشره اللي انا بشوفها كتير لما ببقي قاعد وسط قعده شباب و مانكونش بنهزر اننا ندخل في موضوع الجواز, و كالعادع يأتي احدهم ب قائمه اﻷشياء اللي المفروض بيجيبها الراجل في بلدهم و بنقعد نقارن ما بين المحافظات و نقعد نحسب التكلفه كام و دايما بتبقي رقم انا بعتبروا حاليا فلكي خصوصا انه بيتضمن سعر الشقه و طبعا يفضلوا يسألوني علي اسعار الموبليا بإعتبار اني من دمياط بس طبعا انا ما اعرفش كتير في الحاجات دي خصوصا ان الدمايطه في الغالب ما بيشتروش موبليا زي الناس اللي من المحافظات التانيه, ﻷ الدمايطه بيعملوها
و دايما احب ادس افكاري الخاصه و هي اني مش ناوي اجيب اي حاجه انا مش شايف ان ليها لازمه او ما حدش يقدر يقنعني بفايدتها زي النيش اللي بيتحط فيه اطقم الصيني اللي برضه ملهاش لازمه و بتفضل في النيش طول عمرها, و ماتقوليش عشان نستعمله او لما نعمل عزومه, ساعتها هاحط الصيني في المطبخ و هاكل فيه كل يوم, و برضه التليفزيون, انا بكره التليفزيون"و ده من كتر حبي له صدقوني" بس انا ما فيش عندي اي فرصه لتفرج عليه لا جوم البيت "عشان كميه المسلسلات التركي اللي تيشغلوها عندنا و اللي انا بكرهها فقط لمجرد اني شايفها متوقعه جدا زي مسلسل نور , انا كنت بتوقع حلقتين قدام" و بره البيت انا ماليش في الكوره بس ليا اهتمامات مختلفه جدا عن باقي الناس فغالبا ما بفرضش رأيي و ما بتفرجش علي اللي انا عايزه
و كمان الكمبيوتر و النت بيغني عن التليفزيون, و ان اللي هاتجوزها مش قادره تفهم الحاجات دي او تقبلها لمجرد انها بتحبني"مش عارف علي ايه" يبقي اكيد هانختلف علي حاجات كتير اوي بس انا مقتنع ان اللي بيحب حد ممكن يضحي عشانه و يا سيدي لو خلاص الفتور وصل لمرحله كبيره اوي يبقي ربنا يسهل ساعتها, و ساعتها اساسا التليفزيون ما بيبقاش الحل بس غالبا بيبقي البنج و كمان بيخلي الناس تقارن نفسها و غيرها يناس المفروض ما يقارنوش حد بيهم
زي اللي يقارن مراته بهيفاء وهبي و لا اللي تقارن جوزها بمهند, بصوا للجمال و سابوا كل حاجه تانيه, و بوظوا علاقتهم عشان ناس عيوبهم الظاهره الكتير ما اخدوش بالهم منها و لكن بمنتهي السطحيه بصوا علي الغلاف
انا اشك ان هيفاء وهبي بتسابق الزمن عشان تخلص طبيخ الغدا قبل جوزها ما ييجي من الشغل , و برضوا اشك ان مهند و لا فرات بيه بيرمي الزباله كل يوم و لا بينزل يجيب كيس الملح اول لما مراته تقوله ان مافيش ملح
هي دي الحاجات اللي هي و زيها بتربط البيت, ان كل واحد عارف دوره و بيقوم بيه علي اتم وجه و ماياخدش شغل غيره زي الطبيخ و شراء الخضار من المسلمات"تخيل مثلا لو ما بيتعملوش حياتك هيبقي شكلها ايه"؟يا تري هتفضل تتفرج علي هيفاء برضه و لا هترجع من الشغل تعبان و تقعد تطبخ حاجه تاكلها, و لا لو الجوزك ما جابش الخضار هتقولي لمهند و لا فرات يجيبوا ولا هتلاقي نفسك انتي اللي بتنزلي في عز الحر عشان تجيبيه , ماهو لازم العيال ياكلوا
طبعا انا ما بنفيش اهميه اي حاجه تانيه زي ان الواحد\ه ياخد باله من نفسه\ا عشان الانسان اللي بيحبه و بيشاركه حياته و لكن ما نسيبش الاصول و نمسك في الفروع و لو شايف شريكك غلطان في حاجه راجع\ي نفسك يمكن انت\ي تكون\ي السبب
و هنا استكفي بهذه الخواطر ﻷني تعبت و الي لقاء اخر ان شاء الله
و لكن عشان انا ما عنديش نت اليومين دول ده غير ان باخد فتره علي ما الاقي حاجه تستاهل اتكلم عنها فاصبروا ايها القراء
و انا بقول كده للتلاته اللي بيتابعوا البلوج اللي شكلهم بطلوا يتابعوه
و السلام عليكم و رحمه الله و بركاته
