.............بدون عنوان

اذا اردت شيئا بشده فعليك ان تطلق سراحه, فإن عاد اليك فهو لك و الا فهو لم يكن ملكك من البدايه

damn it, I just ended up loosing all the good stuff...

************************************************************

امبارح كنت رايح عند حبه من اصحابي عشان نذاكر لامتحان ماده "الكومبيلرز" او "لغات البرمجه و المترجمات" و ان مش فاهم ما تتعبش نفسك, و كان المفروض نتقابل بعد العصر بس انا حصلي موقف غريب اخرني و خلاني اوصل بعد المغرب

بصراحه انا مش عارف اوصف الموقف, و غالبا مش هقول كل اللي حصل (لأسباب كتير) , و بصراحه برضه انا لحد دلوقتي مش عارف انا المفروض اتعلم ايه من الموقف ده, و لا حتي اسمي البوست ايه , و عليه فأنا هاقوله و خلاص

***********************************************************

مدونه العباسي للانتاج و التوزيع تقدم لكم

دماغي 1: النفس اللوامه

دماغي -1: النفس الاماره بالسوء

***********************************************************

كان المفروض نتقابل عند سلام و ابو شادي بعد العصر بس انا فضلت انني اقرأ حبه محاضرات قبل ما اروح عشان ما اقعدش زي البطيخه و علي الساعه 7 كنت وصلت لحيطه سد فقررت انزل و اروح لهم

بعد ما لبست هدومي و لسه نازل علي السلم اقيت اللي بيقوللي

الراجل: الا عندكم حد بيفهم في الكمبيوترات او بيصلحها

WTF :دماغي -1

دماغي 1: هو انا باين عليا و لا ايه

انا: ايه, بتقول ايه

دماغي 1: ايوه اعمل اطرش ياخويا

الراجل: بقولك عندكم حد بيفهم في الكمبيوترات, اصل الكمبيوتر عندنا باظ

دماغي -1: قوله ما اعرفش, هو مش البواب حذرنا من الراجل ده اول ما سكننا و قالنا انه بتاع مشاكل و مجنون و بيتخيل حاجات و حراميه و انقلابات

دماغي 1: يعني انت كنت شفت منه حاجه

انا: اه تقريبا هم فوق يعرفوا في الحاجات دي

دماغي -1: اجري ..... اجري .... يمكن تفهملك اي حاجه لو وصلت دلوقتي

دماغي: يا كداب يعني انت ما تفهمش في الكمبيوترات

دماغي -1: انا ما قلتش كده

دماغي 1: انما الاعمال بالنيات و انما لكل امرؤ ما نوى

*********************

يظهر ولد يبدو عليه انه ما بين 13 و 16 سنه خلف الرجل

انا كنت مفكر ان ابنه كبير عن كده

*********************

الراجل: يعني انت ما تعرفش في الحاجات دي

دماغي -1: قوله لأ , يابني انت مش فاضي

دماغي 1: احنا مش اتفقنا ان الكذب از اوت اوف ذا كويستشن

انا: هو الجهاز ماله بالظبط يا حج؟

الراجل: الجهاز بتاع الواد ما بيفتحش و مش عارف ايه المشكله اللي فيه

انا: طب وريني كده يا حج

**********************

دخلت الشقه و هي زي بتاعتنا بالظبط

و كان الكمبيوتر في الوش كده يعني انا ما توغلتش اوي

وقفت قدام الجهاز و بعدين

**********************

انا: هو ماله بقي يا حج؟

الراجل: ما بيفتحش خالص من نفسه كده

انا: طيب

دماغي 1: اعمل بقي شغل مهندسين, بص علي الباور الاول يمكن الجهاز مش واصله كهربا

دماغي 1: اه شوفت, زرار الشاشه مش مفتوح

**********************

قعدت العب في زرار الباور

و الجهاز ما بيفتحش

*********************

دماغي -1: ايه الاحراج ده , امال مهندس كمبيوتر ازاي...... اياك تقوله

********************

الراجل شاورلي علي زرار في الباور سابلاي

ضغطت عليهو الجهاز نور

و في نفس الوقت ....

*******************

الراجل: ما بيقعدش عليه غيره هو و المدرس بتاعه

دماغي 1: مدرس ايه

الولد: بابا .... اجيبله حاجه ساقعه يا بابا؟

دماغي 1: لا حول ولا قوه الا بالله , تقريبا الولد "بسيط" رغم ان مش باين عليه

دماغي -1: قصدك علي قده.... يمكن عشان كده المدرس

دماغي 1: ملناش دعوه

******************

الجهاز كان مفتوح من الجنب

فقفلته و قعدت اضغط علي الكروت

يمكن يشتغل زي جهازي القديم

بس برضه مش شغال

******************

دماغي 1: طب و بعدين

دماغي -1: قوله مش عارف و امشي انت وراك امتحانات

دماغي 1: بس الولد صعب عليا صراحه ومش عايز امشي و الجهاز مش شغال

دماغي -1: شكلك هتبات عندهم انهارده

******************

بعد ما قلت للراجل ان انا مش عارف اصلحه

و انه الاحسن يوديه سيبر

اكتشفت انه مش عايز ينزل

و كان مستعد يديني فلوس عشان اجيبله رامات او اصلحهوله

مع العلم انه لسه حتي ما يعرفش اسمي

******************

دماغي -1: طب ليه؟؟؟؟

دماغي 1: افتكر الفضول الذي قتل صاحبه

الراجل: طب انت ما تعرفش حد ممكن يصلحه

دماغي 1: قوله علي اللي انت موصل النت منه

انا: اه اعرف واحد ورانا هنا

*******************

و بعد ما اعطيته الرقم و اتصل بيه اداني التليفون عشان اكلمه انا

و طبعا الراجل بتاع السيبر سألني علي العنوان و الاسم

فاقلتله العنوان و سألت الراجل علي الاسم , و هنا عرفت انه عقيد متقاعد من الجيش

فقاللي انه هايجي بعد ربع ساعه

*******************

دماغي -1: ياللا بقي انت وراك هم ما يتلم

انا: طب يا حج امشي انا بقي عشان اتأخرت و ورايا مشاوير

الراجل: طب قعد بس و اشرب الحاجه الساقعه

انا: مهلش يا حج انا اتأخرت

الراجل: اقعد بس, يعني انتا لو اتأخرت شويه هايحصل ايه

دماغي -1: و انت مال... انت مش هاتسيبني امشي و لا ايه

دماغي 1: سيكاهاااا , مالوش لازمه الكلام ده

******************

و بعد عده محاولات اكتشفت ان الراجل مش هيسيبني امشي لحد ما الراجل بتاع السيبر يجي

و انا كنت قلتله ان عندي امتحانات و متأخر و كده

******************

الراجل: و امتحانك الساعه كام؟؟

دماغي -1: و انت مال ... و كمان هو مفكر ان انا رايح امتحان دلوقتي, دي الساعه 7 و نص

دماغي 1: اشرب الحاجه الساقعه و روق دمك

انا: لأ انا امتحاني بكره بس رايح لأصحابي بنذاكر سوا

دماغي -1: قصدك بيذاكروا و انت بتتفرج

دماغي 1: يعني مش على طول

الراجل: و ماده ايه دي

دماغي -1: يعني هاتفهم اوي

......انا: دي ماده تبع الكم

دماغي -1: امسك نفسك يا وديع , بلاش فضايح مانتا لسه كنت زي خيبيتها في تصليح الكمبيوتر

انا: ماده اسمها كومبيلرز

دماغي -1: اهو كده مايفهمش.... احسن

الراجل: و انت بقي في كليه ايه

دماغي -1: تبا.... لو سأل علي القسم قوله اتصالات

انا: كليه الهندسه

الراجل: اللي فيين دي

دماغي -1: نعم يا روح امك, يعني هاكون في اسكندريه و في جامعه اسيوط

دماغي: ما بس بقي يا بني, يمكن قصده علي المكان

انا: اللي في الشاطبي

الراجل: اللي جنب استاد الجامعه

دماغي -1: ما انتا حلو اهو

دماغي 1: شوفت بقي ظلمت الراجل ... استغفر الله العظيم

......الراجل: طب , بما انك مهندس يعني

دماغي 1: ما بلاش الكلمه دي لحد اما احس اني استاهلها

الراجل: شوفت الشارع اللي قاعدين يصلحوا فيه ده

******************

كان الشارع اللي احنا ساكنين فيه قاعدين يكسروا فيه كل شويه و يهدوا الرصيف عشان يرصفوه تاني

و شكله فكرني مهندس مدني و قعد يشرحلي ان اللي عمل الرصيف مش فاهم حاجه لأن فيه بلاعه

بتاخد من 4 عمارات و لو حصل انسداد هايضطروا يكسروا الرصيف تاني و المفروض كانوا يعملوا ايه

و ده دخلنا لموضوع السرقه و الرشاوي و ان اللي بيعمل حاجه بيبقي عشان الفلوس

و مش همه ان الحاجه تتعمل كويس او صح

و بينما هو قاعد يكلمني رن جرس الباب و كان الباب مفتوح اساسا

*******************

الابن: ااا ... بابا كلم

الراجل: قوله يدخل

دماغي -1: يا رب يكون بتاع السيبر

الراجل: ادخل يا اندرو

********************

و كان اندرو جايب للراجل سجاير

********************

دماغي -1: لأ شكله ما بينزلش من البيت

********************

لكن اندرو غلط و جاب علبه واحده بدل 4 فرجع تاني يجيب الباقي

يظهر ان مش انا بس اللي بجيب من الراجل المسيحي

بس من غشنا فليس منا و عليه فكده احسن

******************

دماغي -1: تبا

******************

و رجع الراجل يكمل و بدأ يحكيلي ازاي ان مافيش مدرسه كانت راضيه تقبل ابنه

و حتي بعد ما جاب توصيه من المحافظ برضه لما دخل المدرسه كان العيال اللي اكبرمنه بيضربوه

بتوصيه من المدرسين اللي كانوا ما بيحبوش ابوه

*******************

دماغي 1: انا مش عارف الراجل ده بيقول الحق و لا بيكدب بس لو اللي بيقوله حصل يبقي حرام ان حد يحاسب حد بعمل حد تاني او ينتقم من حد في اولاده كده خصوصا في ظروفه دي

*******************

و رجع تاني يشرحلي الرصيف كان المفروض يتعمل ازاي و هو بيشرب سيجاره و فضل يلف حوالين نفس المواضيع

و يكلمني في ان انا غلط اني انا و اصحابي اجرنا في المنطقه دي و في العماره دي بالذات و انا متفق معاه

******************

دماغي -1: السجاير دي رغم انها رخيصه الا ان ريحتها حلوه

دماغي 1: اياك تفكر حتي

دماغي -1: لأ ده انا بشم بس

دماغي 1: ولا حتي تشم , افتكر سرطان الرئه و الالتهاب الرئوي و الربو

دماغي -1: .....خلاص

دماغي 1: اللي يزعل هو ابنه اللي مالوش حد غيره, طب الراجل مش متجوز و عمال يحرق في سجاير و كده يمكن يموت صغير ... طب ابنه هيروح فين

*********************

و كان اندرو رجع تاني بباقي السجاير و ما هي الا دقائق الا و الراجل بتاع السيبر كان جه وراه و دخل و بدأ يشوف شغله

و هنا الراجل كان اطلق سراحي و سابني امشي

و انا ماشي قالي حاجه غريبه اوي

**********************

الراجل: شوف يابني, لو عايز اي حاجه ماتترددش انك تيجي تطلبها مني , و لو عايز مكان تبات فيه احنا عندنا هنا اود"غرف" فاضيه كتير و لو محتاج فلوس اكل اي حاجه تعالي

دماغي -1: نعم (علي طريقع اللمبي)؟

this man is lonely:دماغي 1

انا: ربنا يخليك يا حج .... شكرا

الراجل: ابقي عدي اقعد معانا حبه و كده

انا: ان شاء الله

دماغي -1: اه, من بتاعت ماما

دماغي 1: نو كومنت

*********************

و نزلت و كانت المغرب اذنت فدخلت اصلي في المسجد

********************

انا احد دلوقتي مش عارف الموقف ده حصللي ليه, يا تري المفروض اتعلم منه حاجه و لا حتي اسميه ايه

و عشان كده اسم البوست بدون عنوان

بس انا متخيل ان اللي انا اتعلمته ان المفروض الواحد ما يحكمش علي حد من حاجه سمعها لأن دي منتهي السطحيه

و المفروض الناس تربي اولادها كويس انهم ما يستضعفوش غيرهم

انا لحد دلوقتي او بتشاكل مع حد (مع قله المواقف دي) لو لقيت اللي قدامي مش عارف يعمل معايا حاجه او اضعف مني بسيبه

و كمان مينفعش حد يحاسب حد بأعمال حد تاني

********************

كل دي مجرد افكار بحاول اطلعها من موقف حصللي لأني مقتنع ان مافيش حاجه بتحصل للانسان من غير سبب و عليه فإن الانسان لازم يعصرها عشان يطلع منها حاجه يستفيد بيها

ممكن اللي انا شوفته يكون من وجهه نظر معينه, و ممكن وجهه نظر تانيه تشوف حاجه تانيه بس المهم ان الواحد لما يتعلم حاجه تكون حاجه بترتقي بيه مش حاجه بتقلل منه او تبوظ مفاهيمه

و اتمني تكونوا اتعلمتوا حاجه

سامح

كان يوم من الايام الرخمه كالعاده الخالي من المذاكره, خالي من الانتاج , خالي من كل حاجه

كان يوم حد , و كان ليله شم النسيم

قررت انا و الجيار صاحبي اننا ننزل نتمشي شويه في الشارع علي البحر

اول ما نزلنا في ميامي علي البحر و علي الرغم من ان الجو كان برد شويه الا ان اغلب الناس كانت بتاكل ايس كريم و طبعا دي حاجه ما يتسكتش عليها فقررنا نجيب ايس كريم من جيلاتي عزه, و كان زحمه جدا, و زي كل مره بجيب ايس كريم من هناك الراجل بيكون لابس جوانتي في ايد واحده (غالبا) و يمسك البسكوته بالجوانتي و يقعد يظبط الايس كريم بإيده التانيه , مش بالمعلقه و لا بالجوانتي لأ بإيده

المهم ......... المشي طبعا بيبقي لمسافات طويله و ساعات طويله جدا, بس المره دي مشينا لحد كوبري ستانلي بس و طول السكه قاعدين ننكت و تضحك علي حالنا(ال يعني حالنا يضحك اوي) و فتكر الحوادث اللي شوفناها علي الطريق بتاع البحر و اللي مش لازم تكون غلطان عشان تكون جزء منها , و لا حتي لازم تكون ماشي في الشارع عشان تتداس

و اللي طبعا خلانا متحفظين طول الطريق علشان العربيات اللي جايه علينا زي ما يكونوا بيلعبوا

need for speed

بعد ما قربنا علي ستانلي و كنا ماشيين من ناحيه المباني مش من ناحيه البحر و كنا ماشيين جنب كافيتيريا اسمها

zanelli's

شوفنا منظر خلانا نبطئ شويه بشويه لحد ما وقفنا علي بعد 10 خطوات

وقفنا و بصينا لبعض زي ما نكون متضايقين من نفسنا و اننا لازم نرجع

*******************************

.........الجيار: ايه

...انا: مش عارف

الجيار: ما ينفعش نمشي كده.... مش كده؟؟

انا: اه

*******************************

كنا شوفنا طفل صغير نايم علي الرصيف جنب الهوايه بتاعت الكافيتيريا, شاكله ما يزيدش عن 5 او 6 سنين و نايم جنب الهوايه عشان مطلعه هوا سخن من مطبخ الكافيتيريا

رجعت انا و الجيار عند الولد و وقفنا جنبه عشان نشوف ماله

كان قاعد علي السلمه اللي حولين الكافيتيريا و حاطط ايديه علي رجليه زي ما يكون مربع ايديه و نايم عليهم و كان جنبه كيس

كان لابس جاكيت جينس و بنطلون قماش بس كان قصير عليه

انا فكرت انه ممكن يكون تايه او حاجه و ممكن نرجعه بيته و خلاص و ده فكرني بالمره اللي تهت فيها و انا بدور علي ابن خالتي عشان العب معاه, و ده كان و انا في اولي ابتدائي و طبعا لما اكتشفت اننا تايه كنت مرعوب و اللي يرعب اكتر ان الناس في الشارع هما كمان عرفوا من شكلي ان انا تايه و حاولوا يعرفوا مني انا مين بس انا كل الي كنت اعرفه هما ماما و اختي و نينه و طنط و من غير القاب كمان

و الناس لما ما عرفوش يوصلوا لحاجه سابوني امشي ( الواطيين) بس الحمد لله كنت تايه تحت بيت عمتي

و طبعا اتحرمت من النزول للشارع لحد ما بقيت في سنه رابعه

كل الذكريات دي و انا واقف جنب الولد انا و الجيار مش عارفين نعمل ايه

.......فا حاولنا نصحيه

******************************

الجيار: انت يا حبيبي , انتا يابني(و يطبطب عليه بالراحه) انتا يا ابني

انا: اصحي يا حبيبي انتا نايم في الشارع

وبعد كام محاوله

انا: اصحي يا حبيبي, انتا اسمك ايه؟؟؟
الولد: .... اهه .. سامح ..خخخ

انا: بابا فين يا سامح, ماما فين يابني

*******************************

لاكن سامح كان نام و تقريبا الولد كان تعبان جدا و كتن قاعد يهرش في رجايه كتير مش عارف بقي لأنه ما استحماش من زمان و لا من الناموس اللي في البرد ده

الساعه كانت عدت 11 و كان باين انه مش تايه, شكله من العيال السرييحه اللي بيبيعوا اي حاجه في الاشارات

........حاجه تزعل

في يوم زي ده في وقت زي ده من 15 سنه و زي كا الاطفال اللي في السن ده انا كنت انا و اختي قاعدين معا ماما نلون البيض علشان شم النسيم بكره

اللي بيحصل للولد ده ظلم, ازاي اهله يعملوا فيه كده, و يعني هو لو اشتغل في السن دي و جاب فلوس هيجيب كام و لا هيصرف علي مين

ده عنده 5 سنين

و بكل الشحنات دي جوايا طلعت الموبايل

*******************************

الجيار: ايه يا عم,انتا ها تعمل ايه؟؟؟

انا: هاتصل بالشئون الاجتماعيه يشوفوا هيعملوا ايه

الجيار: يا عم بطل هبل , احنا مالنا

******************************

و بعد مناقشات طويله مع الجيار في الموضوع ده و ايه الصح, و البلد ماشيه ازاي , و التقاليد , و الملاجئ و كل الحاجات دي اترددت بس ما شلتش الفكره من دماغي

و الجيار قرر انه هايروح يجيب للولد اكل و شابني معاه و راح لبقال

و طول ما انا واقف في ناس معديه رايحه جايه جنب الولد و لا كإنه موجود , و الناس بتدخل و تخرج من الكافيتيريا و لا كإنه موجود , يبصوا عليه و بعدين يدوروا وشهم

و بعد ما رجع الجيار حاولنا نصحي الولد تاني و لا هو هنا و لا بسكوت و لا حاجه بتصحيه

كان شكله عايز ينام اوي

و الغريب ان الناس شايفانا بنصحيه و لا حتي حاولوا يشوفوا فيه ايه

رجعت من تاني اكلم الجيار في موضوع اننا لازم نكلم حد من المسئولين عشان احنا مش في ايدينا غير كده

و انا كنت فاكر في التليفزيون مره كنت شفت وزيره مع محمود سعد بتتكلم في موضوع اطفال الشوارع -مش فاكر وزيره ايه بالظبط- بس كانت بتترجي الناس انها لما تشوف اطفال شوارع تتصل بالرقم المجاني 16000 و يستنوا يشوفوا اللي هايحصل و ان المؤسسات علي اعلي مستوي و فاضيه

المهم انا لما افتكرت كل ده قررت ان انا هاتصل و مافيش حاجه ها توقفني و جيت اتصل لاقيت اللي بتقوللي

" عفوا, لقد نفذ رصيدكم"

تبا, هو مش مجاني, اه بس ماهوش طوارئ

..............المهم اخدت موبايل الجيار و اتصلت

***********************

تررررررررررن تررررررررررن

و كان فيه رساله مسجله

الرساله: مرحبا بك في خدمه مش عارف ايه المقدمه من وزاره الاسره و الطفل , اذا اردت الاستعلام عن مش عارف ايه اتصل ب 0900 , و هكذا

و بعدين رد عليا واحد محترم كده زي بتوع خدمه العملاء اللي بيقولوا حضرتك و سيادتك و كده

************************

الجيار: هو محدش بيرد ولا ايه

انا: لأ دا فيه اعلانات

الراجل: مساء الخير, اهلا بحضرتك في مش عارف ايه و ايه و زاره الاسره و الطفل

انا:الو , سلامو عليكوا

الراجل: و عليكم السلام يا فندم , اي خدمه؟

انا: لو سمحت , انا كنت شفت في التليفزيون وزيره بتتكلم عن اطفال الشوارع و اننا نتصل ب 16000 لو لقينا حاجه زي كده

الراجل: بالظبط يا فندم, اقدر اخدم حضرتك ازاي؟

الجيار: انتا بتقول ايه؟

انا: طب انا لقيت طفل في الشارع اهو, فإتصلت

الراجل: طب هو الطفل عنده تقريبا كام سنه؟

انا: عنده حوالي 5 او 6 سنين, و نايم علي رصيف كافيتيريا جنب الهوايه علشان يتدفي من الهوا اللي طالع منها و شكلوا كده بيبيع مناديل او حاجه, جينا نصحيه مش راضي يصحي خالص من التعب,... اه و احنا قدام كوبري ستانلي في اسكندريه

الراجل:طب ممكن اعرف اسم حضرتك؟

انا: اسمي احمد الزكي العباسي

الراجل: تاني كده يا فندم؟

انا: احمد الزكي العباسي, عايز رقم البطاقه!!؟

الراجل: طب هو ده رقم حضرتك اللي ظاهر عندي؟

انا: لأ ده موبايل صاحبي اللي معايا

الراجل: طب ممكن حضرتك تقوللي مكان الطفل فين بالظبط؟

انا: ما قلتلك جنب كوبري ستانلي!!!!!؟

الراجل: انا قصدي المنطقه اسمها ايه؟؟

انا: و انا اش عرفني , انا اساسا مش من اسكندريه, و كمان ده كوبري ستانلي علم , حد ميعرفش مكانه؟؟

الراجل: لأ يا فندم اصل احنا هنا المكتب الرئيسي في القاهره, و محتاجين العنوان عشان نكلم اقرب مؤسسه للطفل عشان توصل بسرعه

انا: اه, طب احنا قدام كوبري ستانلي , جنب فندق دوفيل قدام كافيتيريا زانيلليز

الراجل: طب يا فندم, احنا هنكلم حضرتك بعد شويه

انا: طيب ماشي

********************

و قفل الراجل المكالمه, و انا و الجيار ما كونناش شايفين ان فيه حاجه تانيه ممكن نعملها. و فضلنا نلف حوالين المكان و حوالين الكوبري في انتظار مكالمه الراجل, و طول ما احنا مستنيين ناس تعدي و ناس تدخل و تخرج من الكافيتيريا , اللي يبص عليه, و اللي يعمل انه مش شايفه, و اللي ما ياخدش باله اساسا, و عدي اتنين شباب شافوه و وقفوا يشوفوا ماله, و حاولوا يصحوه و برضه مش راضي يصحي, و اخر ما زهقوا مشوا

و روحنا و جينا و لقينا فيه ناس حواليه قلنا نروح نشوف. كان الاتنين الشباب اياهم رجعوا, و فيه واحده ست و كان فيه واد صغير شكله 10 او 11 سنه

الست كانت بتحاول تصحي سامح, بس كانت بتصحيه بعنف شويه بطريقه تدايق , و ده خلي الناس اللي واقفه تفكر انها تعرفه

كانت بتصحيه و بتقله يقوم عشان يروح معاها , بس كانت بتقولها بطريقه تبان انها بتعمل كده شفقه بيه, مش عشان انها تعرفه, و سامح مش عايز يصحي

اتلم الناس بطريقه خات الناس اللي في مطبخ الكافيتيريا ياخدوا بالهم , فواحد من جوه شاورلي من الشباك بطريقه معناها "هو فيه ايه" , فرديت عليه " تعالي شوف" , شكلهم فكروا فيه حاجه بتحصل مهمه , فخرج لنا راجل محترم لابس بدله من غير كرافته و مليان شويه كده باين عليه الهيبه و شكلوا من اللي بيحلوا المشاكل

خرج الراجل المحترم, و كان فيه جرسون من الكافيتيريا واقف بره فا المحترم سأله هو فيه ايه؟ فالجرسون جاوبه بإنه شاورله علي سامح, فالراجل بص عليه كده و مشي زي مايكون كان خارج لحاجه تانيه بس الموقف شد انتباهه مش اكتر مش لأنه خارج يشوف فيه ايه و ما عدناش شوفناه تاني

و في نفس الوقت كانت الست نجحت في انها تصحي سامح و شدته من ايده عشان تاخده معاها و المفاجئه انه مشي معاها بس كان زي ما يكون مش عايز يروح

في اللحظه دي كلنا خمنا انهم يعرفوا بعض فأحد الشباب سأل الواد الصغير اللي واقف " هو يعرفها" فالواد قال " دي باينها امه" و تقريبا هي اخدت الكلمه علي سدرها اوي و قالت "امه!!!؟ و لا امه ولا اعرفه" و هنا سامح زرجن معاها و مبقاش عايز يمشي فسابته و قالت احسن

و سامح راجع علينا سأله الجيار " تعرفها دي؟؟" قال سامح و هو مبتسم " و لا عمري شفتها" و رجع مكانه و مش هتصدقوا ... نام تاني

زي ما يكون هايموت من التعب

ايه اللي يخلي طفل زي ده في الشارع لحد دلوقتي و عايز ينام بالشكل ده

الواد الصغير شكله كان عارفه, فأحد الشباب سأله " انت تعرفه؟" فقال الواد " اه ده سامح" فسألته هو منين فقاللي انه من المندره

فقلتله:"دي في اخر الدنيا .هو ايه اللي جابه هنا؟" فقال انه بيبيع مناديل و كده بس تقريبا الواد ده طلع ما يعرفش اكتر من كده. و في نفس الوقت جه علينا راجل شكله في الخمسينات و تخين شويه و عنده شنب و اصلعحبه من فوق, زي ما يكون اللمه لفتت نظره

و قال" ماله الواد سامح" و لما لقاه نايم قال طب سيبوه هو هينام شويه و بعدين هيمشي

و انا طول الوقت ده قاعد افكر في المكالمه اللي المفروض انا مستنيها

و فعلا الناس كلها اتفضت و مشوا كلهم و انا و الجيار بعدنا شويه, كنت بفكر يا تري اللي انا عملته صح و لا غلط ان انا كلمت الناس دي

و كان عدي حوالي ربع ساعه من المكالمه و هنا الجيار تليفونه بدأ يرن و رديت بس كان راجل تاني بيكلمني

*********************************

ترررررررررن تررررررررررن

انا: الو, سلامو عليكوا

الراجل: و عليكوم السلام يا فندم, الاستاذ احمدالزكي العباسي؟

انا: ايوه انا

الراجل:حضرتك اتصلت من شويه ب مش عارف مين و قلت عن طفل مش عارف ماله و ايه

انا: ايوه ( و حكيت له الحكايه تاني و الجديد فيها) بس

الراجل: طب ممكن العنوان

انا: كذا كذا كذا

الراجل: طب احنا مسافه السكه و هنكون هناك

********************************

قفل الراجل المكالمه و الجيار قاللي ان خلاص كده احنا عملنا اللي علينا و المفروض نمشي بقي, قلتله لأ احنا هانستني لما نشوف ايه اللي هايحصل زي ما الوزيره كانت بتقول علشان نتأكد انهم هايعملوا اللازم

و فضلت انا و الجيار نلف تاني حوالين الكوبري و نتصور حبه و نقعد حبه و نمشي حبه لغايه اما الساعه عدت 12

الجيار بقي غايز يروح بحجه ان مالوش لازمه القعاد و كمان ان دي الحكومه و المفروض ما نستناش ان حاجه هتحصل لأن مافيش حاجه هتحصل و انا عايز استني بحجه انهم بني ادمين برضه الحكومه دول و اكيد عندهم قلب في حته ما و هيحنوا علي الواد الصغير ده

و فضلنا نتناقش لحد ما عدت اكتر من نص ساعه علي اخر مكالمه و مفيش حاجه بتحصل برضه

اخدت الموبايل من الجيار و اتصلت بالرقم اللي اتصل بيا من اسكندريه و بعد ما سمعت الاعلانات

*********************************

ترررررررن ترررررررررن

الرساله: مرحبا بك في خدمه مش عارف ايه المقدمه من وزاره الاسره و الطفل , اذا اردت الاستعلام عن مش عارف ايه اتصل ب 0900

انا: الو سلامو عليكوا

(الراجل : و عليكم السلام هنا مش عارف ايه تبع وزاره ال..... (و انا قاطعته

انا: لو سمحت, انا اتصلت من تلتتربع ساعه علي مكتب القاهره عشان كذا كذا و اتصل بيا مكتب اسكنريه من اكتر من نص ساعه و قالوا انهم جايين بس لحد الوقت لسه ماحدش جه؟

الراجل سكت ثواني و قال: لأ يا فندم ده هما علي وشك الوصول

انا: هما جايين منين بالظبط؟

الراجل: من مؤسسه في محطه مصر

انا: من محطه مصر ل كوبري ستانلي الساعه 12 باليل و لسه ما وصلوش من اكتر من نص ساعه؟؟؟

الراجل: لا يا فندم دا هما قربوا يوصلوا خلاص

(انا: طيب (و قفلت السكه

الجيار هما شكلهم جايين من محطه مصر اللي في القاهره

انا: باين كده

*******************************

اقتنعت برأي الجيار و روحنا سوا من غير ما نعرف ايه نتيجه اللي عملناه

و لحد النهارده انا ما اعرفش ايه اللي حصل, و برضه مش متأكد بالظبط هاتفرق معايا في ايه , بس ده طرح تساؤلات كتير اوي انا يمكن ما كنتش مديها اولويه قبل كده زي ازاي ده يحصل في بلد مسلمين؟, و لا حتي ازاي يحصل وسط بني ادمين ان طفل في السن ده يبقي مشرد و ما حدش حتي مكلف نفسه يبص عليه؟ و لاهو سامح ده او غيره من الاطفال اللي زيه و اللي هما كتير و انا ما شفتش الكم ده الا لما خرجت من دمياط سواء في القاهره او اسكندريه, هل الاطفال دول اهلهم هما اللي عاملين فيهم كده؟ طب ازاي جالهم قلب بسيبوا اولادهم في البرد يتدفوا بهوا خارج من مطعم ولا غيره؟ طب و ان كانوا ايتام ازاي المجتمع( اللي هما احنا) يسمح بإن ده يحصل و يظهر هذا الكم من ال لا مبالاه بالأطفال دول

طبعا انا مش عارف بالظبط ايه اللي المفروض يتعمل لو لقيت حاله من دي في الشارع ولا حتي عارف اسمع من مين اعمل ايه

و طبعا فيه اللي هايقول يا عم مش اما نلاقي ناكل احنا الاول نبقا نشوف العيال المشرده في الشارع

انا مش بكتب الحكايه اللي حصلت دي عشان اقول ان المفروض نعمل كذا او نعمل زي ما انا عملت, بس هي دعوه للتفكر و المفروض الواحد يفكر هايعمل ايه .... هيعدي ولا كإنه شاف حاجه و لا هايقف يتفرج زينا كده و لا لو ما كانش في ايده حاجه يعملها يشوف حد في ايده انه يغير الوضع و يقوله

و طبعا ده ينطبق علي حاجات كتير بنشوفها و بنعديها ولا كإننا شايفين حاجه بس مش مكانها هنا

اتمني انكوا تكونوا استفدتوا من الحكايه دي و تخليكوا تفكروا صح

انتهت

علي متن شرق الدلتا 3

في الجزء السابق

************************************************

قعدت مكاني في الاتوبيس و انا حاسس اني عايش فيلم هندي من اللي بيحصل فيه حاجات عجيبه كده

بس حمدت ربنا ان احنا في الاتوبيس

يعني فيه تكيف

و اعدت العب في التكيف شويه بس مششغال...... العب تاني برضه مش شغال

*************************************************

انا: هو التكيف مالو

!!!رامي: مش عارف.... م شغال عندي

راكبه 8: هو التكيف مش شغال عندكوا كمان؟؟

انا: اه , هو فيه ايه

راكب 4: يا اسطي... هو انت قفلت التكيف و لا ايه...؟

السواق: ايوه, اصل الجاز مش هيكفينا طول الرحله لو فضلنا فاتحين التكيف

رامي: صلاه النبي احسن

انا: هو الاتوبيس بيمشي بالجاز.....؟

علي متن شرق الدلتا 3

انا: هو التكيف مالو

!!!رامي: مش عارف.... م شغال عندي

راكبه 8: هو التكيف مش شغال عندكوا كمان؟؟

انا: اه , هو فيه ايه

راكب 4: يا اسطي... هو انت قفلت التكيف و لا ايه...؟

السواق: ايوه, اصل الجاز مش هيكفينا طول الرحله لو فضلنا فاتحين التكيف

رامي: صلاه النبي احسن

انا: هو الاتوبيس بيمشي بالجاز.....؟

رامي: و هو ده وقته يا عباسي!!؟؟

انا: خلاص خلاص يا عم , ما تزعلش نفسك اوي كده

انا(تاني):يا اسطي, .....طب احنا هنعمل ايه دلوقتي يا اسطي.... احنا كده هنفطس

السواق: افتح الهوايه اللي فوقك يا بيه

******************************

بصيت فوقي لقيت الهوايه ففتحتها, و حسيت زي ما اكون علي البحر ففرحت طبعا لأني مش هأعد 5 ساعات في الحر, لاكن بمجرد ما رجعت للكرسي بتاعي ما لقيتش هوا خاااالص

******************************

انا: اخص, دا الهوا تحت الهوايه بس

رامي:وسع

*******************************

بعد ما وقفت انا و رامي تحت الهوايه , و بعد ما عدناش بنعرق و خلاص بقينا تمام(طبعا تحت نظرات الاتوبيس كله) زي ما نكون اخدين الهوا كله لينا لوحدنا, طبعا لو كان حد عايز يتهوي كان جه تحت الهوايه بس تقريبا الركاب كانوا اكسل من انهم يتهووا

قعدت انا و رامي مكاننا

رامي قرريحط ال ام بي 3 في ودانوا, و انا قررت انام لأني مانمتش كده خالص

و كل شويه الهزه تصحيني, و اقلق و ابص من الشباك الاقي شوارع واسعه اوي ما شفتهاش قبل كده

و فضلت علي هذا الحال حوالي ساعتين لحد ما مره قلقت و بصيت من الشباك

شوفت حاجه غريبه اوي

شوفت يافطه مكتوب عليها (القاهره 60 كيلو) ؟؟

و طبعا زي الافلام رجعت انام تاني لحد ما استوعبت المعلومه و اتخضيت

********************************

انا: رامي .... انتا يا عم

رامي: ايه .. ايه, انا صاحي اهو في ايه

انا: هو احنا فين يا روميو؟؟؟؟

رامي: و انا اعرف منين!!؟؟

انا: انا لسه شايف يافطه مكتوب عليها(القاهره 60 كيلو)و مش فاهم حاجه

رامي: ...........!!؟؟

انا: طب استني, انا هاسئل السواق

..............................

انا: ايه يا اسطي ....هوا احنا فيين؟؟؟

السواق: أأأأ.... لسه شويه يا بيه

انا: شويه ايه يا اسطي؟ دا انا لسه شا يف يافطه بتقول اننا 60 كيلو و نوصل القاهره...!!؟

*******************************

اكتشفت ان السواق تاه, و ده لأنه عمره ما مشي في السكه دي قبل كده

ال ايه سواق دولي

لأ ومش كده و بس, لأ دا هوا و الرجاله اللي راكبين معانا بقالهم اكتر من ساعه قاعدين يسألوا في الطريق

و مش عارفين يروحوا فين

لأ و لسه

ما هي المصايب ما بتجيش الا جماعات

الجاز اللي في الاتوبيس قرب يخلص كمان, عشان تكمل

و طبعا طاعت الاقتراحات

يا اسطي طب ما تمون في اي بنزينه

يا اسطي طب ما تتصل بالشركه

لاكن السواق ما كانش بيعطي رد واضح هو عايز يعمل ايه

و اكيد طبعا كل الركاب فهموا ساعتها ان السواق خايف يتصل بالشركه و يكون هو اتصرف غلط

و فهموا برضه ان السواق مش عايز يدفع فاوس البنزين

و هنا قررنا اننا ندفع(الركاب) البنزين, بس المفاجأه ان السواق ما كانش راضي برضه

هنا كنا كلنا مش فاهمين حاجه

**************************

بعد دقايق من اللي حصل ده لمحنا اتوبيس من نفس الشركه طاير علي شمالنا

طرنا وراه و فضلنا نزمرله لحد ما اخد باله مننا و وقفلنا

و بعد ما حكينا لهم الحكايه(السواق و التباع, الاتوبيس كان فاضي) مشونا وراهم لحد ما وصلنا طنطا, و فضلنا ماشيين وراهم في طنطا لحد ما وصلنا للموقف بتاع فرع الشركه في طنطا

و وقفنا هناك

انا طبعا كنت مستعجل, عايز انزل اول واحد عشان الحق

لأني لو اتأخرت كله هيسبقني لأن كله اكيد بيفكر في نفس الحاجه(الحمام) اكيد طبعا

**************************

رامي: رايح فيين يا عبس...بتجري كده ليه يا عم

انا:........ما اعرفكش

رامي:؟

****************************

طبعا جريت اسأل علي الحمام و دورت عليه و لاقيته

دخلت و خرجت و كان الناس لسه جايين

و كان حمام واااااحد بس في الموقف كله

طبعا لو كنت هاستني كل واحد ولا كل عيل صغير مامته و لا باباه هايغيرله يبقي ما كنتش هاخلص

و بعدها خرجت و قعدت الف في الموقف شويه , و ادور علي رامي بس ما لقيتوش

لقيت جامع, فدخلت و صليت الظهر و العصر اللي فاتوني, . و قبل ما اخرج لاقيت راجل شكله هايأذن للمغرب فا استنيت الصلاه و صلينا المغرب... كنا اربعه بالامام

كان الجامع صغير ما فيهوش حتي حمام, مجرد حنفيات للوضوء

*****************************

بعد ما خرجت من الجامع كان السواق بيلم الناس عشان نمشي

فجريت علي الكتفيتيريا اشتري اي حاجه اكولها

و لاقيت رامي هناك

******************************

ركبنا الاتوبيس , و انا نمت لحد ما و صلنا دمياط

كانت الساعه 11 باليل, يعني متأخر 7 ساعات عن الاكل...أأ.....البيت

طبعا وصلت البيت و ما كنتش شفته من اكتر من شهر و نص تقريبا و احتفلوا بيا كالعاده بصناف الطعام المختلفه

و طبعا سلمت علي حبايبي.. التلاجه.....و البوتاجاز

و اكيد حكيت الحكايه دي لهم في البيت ..... بعد ما اتعشيت طبعا

انتهت

**************************************************************

طبعا الحكايه هنا انتهت بس يا ريت ما تخرجوش من هنا الا لما تشوفوا انتوا استفدتوا ايه من اللي حصل ده

الحكايه ما كانش الغرض منها ترفيهي و لا سياسي و لا اجتماعي

هي مجرد سرد لواقع حصل و عليكم انتم انكوا تفهموه

سواء من الاحداث او الشخصيات او الانفعالات

و اتمني تكون عجبتكم

على متن شرق الدلتا 2

..........في ال جزء السابق

ترررن......... ترررن

انا: الو ..سلامو عاليكوا

ابو شادي: و عليكوم السلام يا مان ...عامل ايه.. سلمت المشروع ؟

انا: اه يا عم سلمتوا.. إللا انت فين دلوقتي؟ و فيه ايه بيحصل في بلدكوا؟؟

ابو شادي: انا في بورسعيد باتفسح مع اصحابي, و بتسأل علي بلدنا ليه؟

انا: لا مفيش اصلنا محبوسين في الشارع و بلدكوا بتطلع دخان بس

ابو شادي: هاهاهاها ... هما عملوها تاني.. اهاهاهاهاها

انا: هما مين دول؟؟ و عملوا ايه بالظبط؟؟

على متن شرق الدلتا 2

انا: الو ..سلامو عاليكوا

ابو شادي: و عليكوم السلام يا مان ...عامل ايه.. سلمت المشروع ؟

انا: اه يا عم سلمتوا.. إللا انت فين دلوقتي؟ و فيه ايه بيحصل في بلدكوا؟؟

ابو شادي: انا في بورسعيد باتفسح مع اصحابي, و بتسأل علي بلدنا ليه؟

انا: لا مفيش اصلنا محبوسين في الشارع و بلدكوا بتطلع دخان بس

ابو شادي: هاهاهاها ... هما عملوها تاني.. اهاهاهاهاها

انا: هما مين دول؟؟ و عملوا ايه بالظبط؟؟

ابو شادي: لا , اصل البلد عندنا مقلوبه اليومين دول البلد عندنا مقلوبه شويه

انا: البلد عندكوا مقلوبه ليه يا عم ان شاء الله؟

راكب 2 ينظر الي كأني علي وشك ان اعرف سبب ما نحن فيه, و هو محق

ابو شادي: اصل اليومين دول الصيد بيبقا ممنوع و هي دي الشغلانه الوحيده اللي اهل البلد بيشتغلوها, زيد علي كده كمان انهم كل شويه يقطعوا الميه بغباء عن البلد عشان يودوها لمصيف بلطيم, و اخيرا بقي... و ده كان القشه اللي قصمت ظهر البعير .. منعوا عننا الدقيق,

يعني من الاخر البلد لا حد فيها عارف يشتغل و لا حد عارف ياكل و لا حد عارف يشرب.

انا: أأأ.... منعين عنكوا الدقيق ازاي....؟

ابو شادي: اه و الله, الدقيق المدعم اللي بيتعمل منه العيش البلدي ده بطلوا يوردوه للبلد

انا: و الله عندكوا حق تتدايقوا, بس الناس المسافره ذنبها ايه يا عم؟؟

ابو شادي: طب قولي الناس تعمل ايه, هي دي الطريقه الوحيده اللي بتخلي المسؤلين ياخدوا بالهم مننا و يردوا علينا

انا: اه, ربنا معاكوا يا معلم, بقولك ايه.. انا لازم اقفل عشان الرصيد علي وشك النفاذ

ابو شادي: ماش يا مان, بس انتوا هتعملوا ايه دلوقتي؟؟

انا: مش عارف, قوللي انت

ابو شادي: ما قدامكمش الا انكوا ترجعوا و تلفوا من طريق مطوبس حوالين البحيره

انا: طريق ايه يا اخويا؟؟؟؟؟

ابو شادي: مطوبس

انا: ماشي يا معلم, الف شكر

ابو شادي: بييس يا مان

انا: و انت من اهله

******************************************

بعد ما قفلت السماعه لقيت كل الجاله بتبصلي كأني عارف ايه اللي بيحصل و ان المفروض دلوقتي اقولهم

وبعد ما حكيتلهم اللي ابو شادي قاله.. حسيت انهم مش مصدقين اللي قلته

عندهم حق

ايه اللي يخلي الحكومه تمنع الدقيق عن البلد دي, دي حاجه جديده اوي اول مره نسمعها

بعد كده توجهت الانظار الي السواق

********************************************

راكب 3: ايه يا اسطي هنعمل ايه دلوقتي؟؟
السواق: ها...... مش عارف يا بيه

راكب 4:يا اسطي انا شايف اننا نكمل و نشوف هنوصل لحد فين, و اهو السكه اتفتحت خلاص اهي

كانت السكه فعلا اتفتحت لأن عربيات كتير قررت انها ترجع, و لفوا فعلا و رجعوا

انا: ايه يا جماعه , الراجل اللي من البلد قال نلف من طريق مطوبس لان الناس دي بايعاها و معندهاش حاجه تخسرها و مشكلهمش هيفتحوا السكه النهارده, و تقريبا دي مش اول مره يعملوها

راكب 1: اه , انا فاكر حاجه زي كده حصلي قبل كده, حتي كان المطرب محمد ثروت وقف زينا كده و كان اتصل ب برنامج 90 دقيقه

رغم ان الكلام كان بدأ يبقي منطقي الا ان السواق قرر اننا هنكمل

*****************************************************

بعد ما مشينا بالاتوبيس مسافه حوالي 3 كيلو , و طبعا كان بطول المسافه عربيات و مقطورات راكنه في الشارع خايفه تكمل, لغايه ما وصلنا الي الكوبري اللي بيمر بالبلد دي

كنا قبل الكوبري بحوالي 600 متر " مش عارف ايه الدقه دي " و كان المنظر كالتالي

علي مدي البصر كان الكوبري و كان عليه حريقه كبيره اوي هي دي اللي مانعه الناس انها تعدي

الحريقه دي فكرتني ايام ما كنت في ثانوي و كنت بروح كل حته بالعجله بتاعتي لحد ما جه يوم انتخابات مجلس الشعب, و كان ممنوع الناس تدخل تنتخب(عشان مينتخبوش الاخوان طبعا) و كان عساكر الامن المركزي مالي الشارع بيضربوا قنابل مسيله للدموع علي الناس اللي في الشارع

و طبعا لأني من المجتهدين خرجت و كان لازم اروح درس العربي عشان يجي الدخان في عيني , و اخبط كل اللي كان قدامي بالعجله

بس مش ده سبب اني افتكرت اليوم ده

السبب ان يومها الاخوان كلنوا حرقوا عجلات كاوتش فوق الكوبري اللي بيخرج بره البلد(نفس الموقف) ومن مكان تاني سدوا الطريق لراس البر عشان منها ممكن اي حد يعدي النيل من عند عزبه البرج

طبعا انا مش هتكلم عن انهم لما جابوا دمياط في التليفزيون يومها , جابوا مدرستي و اللي هي المدرسه الوحيده اللي محصلش عندها مظاهرات لأن الشارع قدام الباب ديق من الناحيتين, بس عم صبري بتاع الشاي طلع يومها في التليفيزيون , و اكيد كان بيعمل للكاميرا باي باي من ورا المذيعه

بس سيبكوا من السياسه, انا اصلا ما احبش اتكلم فيها, و القصه دي مش موضوعنا اصلا

**********************************

المهم ..... وقف الاتوبيس مع الاتوبيسات الواقفه و نزل الرجاله للمره الثانيه

و بعد ما سألنا بعض الناس الواقفه اتأكد لنا بعض من اللي ابوشادي كان قالوا

و قررنا جميعا اننا نستني الفرج

(و ده طبعا لأن حتي و لو رجعنا اسكندريه فأكيد مش هنرف نسافر اليوم ده لان السكه مقفوله" ايه الذكاء دي" ها )

*********************************

رامي: باقولك ايه يا عبس, ما بما اننا قاعدين ما تيجي نروح نشوف ايه اللي بيحصل هناك

انا: ماشي , اهو بدل القعده

*******************************

بعد ما مشينا بشويه قرر بعض الركاب يعملوا نفس الحكايه

و طبعا كل اما نقرب الصوره تتضح اكثر

ناس كتير رايحه زينا ناحيه الكوبري, و من بعيد الكوبري مليان ناس اغلبهم لابسين جلاليب زي بتاعت الصيادين اللي في النيل

و فيه عجل كاوتش كتير محروق على خط من الطريق , و الخط الثاني عليه قارب صيد صغير مولعه فيه النار

و الحته المفتوحه من الطريق بالكاد تكفي عربيه ملاكي صغيره

و الطريق الوحيد اللي مش محروق هو الطريق اللي بيدخل علي البلد, و طبعا انا عارفه لأن ده مكانش مبني اول ما دخلت الكليه

فكنا بنشوف الطريق و هوا بيتبني من اوله كل اما نسافر

بعد ما وصلنا للكوبري , زاد الموقف حراره

كنا قد قاربنا علي العصر و العرق بينزل من الناس كلها زي المطر

****************************

انا: مش كان احسن لنا نفضل في التكيف في الاتوبيس احسن

رامي: يا عم سيبك, اديك بتاخد حمام شمس

انا: ! ... نعم(علي طريقه اللمبي) ه

***************************

طلعنا فوق الكوبري و من فوق كنا تقريبا شايفين البلد كلها

الستات قاعدين تحت جنب الكوبري, و الرجاله فوق الكوبري يباشرون اعمال الحرق

و الاطفال يلعبون بالاطارات المحروقه و كل شويه يحركوا القارب المحروق اقرب حتي يزيدوا الطين بله

البحيره علي يمينا, و البحر علي الشمال

المهم.... لاقينا راجل عجوز كده قولنا تلاقي الراجل الطيب ده عنده الزتونه بتاعت الموضوع, و هو اللي هيحلهالنا

كان راجل باين عليه الهيبه

******************************************

انا: سلامو عليكوا يا عم الحج

الحج:(بلهجه تشبه التوانسه) و عليكم السلام يا ابني

رامي: الا هو فيه ايه بالظبت يا عم الحج؟؟؟؟؟؟؟

و حكي لينا الراجل نفس القصه و في نفس الوقت كان باقي الناس قربوا علينا و سمعوا الحكايه

راكب 3: طب يا حج ليه ما اشتكيتوش للمسؤولين؟؟؟

واحد ما اعرفوش:(بلهجه تشبه التوانسه) يا عم احنا عملنا اللي ما يتعمل و لا حد سائل فينا

الحج: بس يا علي اسكت انتا

علي: اممممممممممم

راكب 5(اخيرا فتح بقه) : طب ما كلمتوش عضو مجلس الشعب فلان الفلاني" مش فاكر اسمه" ليه؟؟
علي: عااااا

ينظر الحج الى علي بصرامه فيسكت على الفور

الحج: يا ابني احنا جربنا كل حاجه, بس ما حدش بيسمعلنا, و بتاع مجلس الشعب ده و لا عبرنا

رامي: طب يا حج ذنت الناس اللي مسافره دي ايه انها تتحبس و تتعطل عن مصالحها كده؟؟

الحج: اهو يابني نصيبكوا كده

انا: طب يا حج احنا معانا اطفال... ذنبهم ايه يتحبسوا في الحر ده...؟

الحج: و هما اللي مش لاقيين ياكلوا ولا يشربوا عندنا دول مش اطفال....؟ و لو عايزين ميه ولا حاجه ممكن تدخلوا البلد تجيبوا منها.. ان لاقيتم

***************************************

طبعا هو عنده حق ان الاطفال اللي عندهم برضه محتاجين ياكلوا و يشربوا بس ده طبعا ما يديش الحق لحد انه يحبس ناس ملهاش ذنب في الحكايه دي

اكيد احنا ك بنيآدمين لينا دور في الحكايه دي بس صعب تحط اللوم علينا بطريقه مباشره

المفروض ابسط احتياجات الانسان هي المأكل و المشرب و المسكن و الملبس ... بس فيين؟؟

الحج: علي فكره احنا سايبين مكانفي الطريق يعدي العربيات الصغيره, فلو هتعدوا يبقي دلوقتي عشان شويه كده و هنقفل الكوبري كله

راكب 1: طب و الاتوبيسات يا حج؟؟

الحج: ما قدامكوش غير طريق مطوبس, ارجعوا بالاتوبيس لحد ما توصلوله و بعد كده لفوا من حوالين البحيره

علي: احمدوا ربنا اننا ما قفلناش المحاور

بعد الحوار ده قررنا نرجع الاتوبيس, و كان الاتوبيس بيحاول يلف بالفعل من نفسه

و ده كان عشان عربيات الامن المركزي و عربيات الشرطه كانت ملت المكان و قالت للسواقين يرجعوا

و في نفس الوقت كان اهل البلد بيسدوا اخر جزء مفتوح في الطريق و طلعوا القارب المحروق قدام شويه عشان الامن المركزي ما يعرفش يدخل البلد

*********************************************

ركبنا الاتوبيس و الحزن يعتلينا كلنا لأن الطريق حوالين البحيره طويل و ممكن ياخد اكتر من 5 ساعات, و كنا حوالي الساعه 4

يعني في الوقت اللي المفروض نكون وصلنا فيه دمياط, و الاتوبيس في طريقه لبورسعيد

*********************************************

تررررررررن تررررررررررن

انا: الو سلامو عليكو

ماما: ايه يا احمد.. وصلت بالسلامه؟؟

انا: لأ... انا لسه في نص السكه .. اصل حصل كذا كذا

ماما: طب و انت كويس ياحبيبي , جعان ..معاك ميه....؟؟؟؟؟؟؟

انا: انا كويس الحمد لله, بس رامي عايز يدخل الحمام

رامي: رامي مين!! انا...؟ انت بتكلم مين؟؟؟

انا: باقولك ايه احنا كلنا الحمد لله بخيربس هنطول شويه. يمكن نووصل علي 8 او 9 باليل ان شاء الله

ماما: طيب يا حبيبي تيجي بالسلامه

انا: طيب ماشي... مع السلامه

ماما: مع السلامه

**************************************************

قعدت مكاني في الاتوبيس و انا حاسس اني عايش فيلم هندي من اللي بيحصل فيه حاجات عجيبه كده

بس حمدت ربنا ان احنا في الاتوبيس

يعني فيه تكيف

و اعدت العب في التكيف شويه بس مششغال...... العب تاني برضه مش شغال

*************************************************

انا: هو التكيف مالو

!!!رامي: مش عارف.... م شغال عندي

راكبه 8: هو التكيف مش شغال عندكوا كمان؟؟

انا: اه , هو فيه ايه

راكب 4: يا اسطي... هو انت قفلت التكيف و لا ايه...؟

السواق: ايوه, اصل الجاز مش هيكفينا طول الرحله لو فضلنا فاتحين التكيف

رامي: صلاه النبي احسن

انا: هو الاتوبيس بيمشي بالجاز.....؟

.................يتبع