Saturday, February 12, 2011

ما بعد الثوره

بعد شعور طويل بالذنب و أنا عند الحلاق يوم الخميس ﻷن مشاركتي في الثوره كانت أقل مما ينبغي (في رأيي) فقررت إني أنزل في مظاهرات يوم الجمعه 11-2-2011 و كانت أكبر مظاهره اشتركت فيها لحد دلوقتي و دمياط كان فيها أكتر من 200,000 متظاهر زي ما الجزيره كانت بتقول و طلعنا في التليفزيون و في اﻷخبار, و طبعا لفينا دمياط كلها (اللي هيا أساسا حته قد كده) (و الحمد لله, رغم كل المشي ده ما كنتش بعرج, غالبا الروح المعنويه لها دور) و كان شعور رائع باﻹنجاز و كنت قررت أنا و الجيار إننا نروح ميدان التحرير و أعددنا العده و بعدها نفاجأ إن مبارك يتنحي عن السلطه, و تعم مصر اﻹحتفالات أكتر من أيام أما أخدنا كاس أفريقيا 200 مره, و الناس ماشيه في الشارع تغني أغاني وطنيه, و تبص في وش الناس تحس إن في بسمه مرسومه عليها و السعاده هتنط من عنيهم, و الروح المعنويه للشعب مرتفعه جدا لدرجه عمر ما حد كان يتوقعها, و دلوقتي اتكتبت في سجلات التاريخ ثوره قام بها شباب الفيس بوك و هي اﻷولى من نوعها في العالم و تظل مصر صانعه التاريخ.ء
و من أظرف ما شفت بعد الثوره هو اليافطه اللي مكتوب عليها "ارجع يا مبارك, كنا بنهزر معاك " و عليها إمضاء الكاميرا الخفيه
الشعب المصري دايما دايما يدخل الفكاهه في كل حاجه سواء في الحزن أو في الفرح
و أكتر حاجه زعلتني إنهم كل أما ييجي محافظ كويس في دمياط يشيلوه  و بجيبوا حد تاني مكانه, زي عبد العظيم وزير لما خلى دمياط تتظبط و شكلها بقى حلو خلوه محافظ القاهره, و بعديه البرادعي (قريب البرادعي بتاع التغيير) اللي تولى المحافظه بعده شالوه دلوقتي و خلوه وزير اﻹسكان في الوزاره الجديده, و جابوا واحد كل دمياط بتدعي عليه عشان مش راضى يعطي العمال تعويض البطاله و بيقولهم انتوا شعب غني
تبا له, اهو كان هيتسبب في قتل نفسه
-------
كل اللي الواحد شافه من الحاجات اللي كانت بتتسرق من مصر و الظلم اللي كان واقع على الشعب المصري كانت حاجات تحرق الدم و لا تزال القضايا مفتوحه و إن شاء الله ستعود جميع حقوق الشعب المصري المسلوبه و أمواله المسروقه, و اللي تخليك تتسائل , كل المليارات المسروقه دي كانوا ممكن يغيروا مصر إزاي؟ طب اللي سرقوها كانوا بيعملوبها إيه؟! يعني كانوا بياكلوا أكتر من 3 وجبات في اليوم, ولا بيلبسوا كل يوم بدله جديده؟؟
------
أيا كان عشان بس ما أطولش عليكم كالعاده هدخل في الموضوع
------
______________________________________
ماذا تعلمنا من ثوره 25 يناير؟
-------------------------------
المصري روحه المعنويه ارتفعت و بقى حاسس بقيمته و كيانه
المصريين دائما هم صانعوا التاريخ
الثوره بتاعتنا هي اﻷولي من نوعها و اﻷكبر في العالم حتي اﻷن
و سبحان الله هي الثوره اﻷكثر تنظيما و اﻷكثر سلميه و بدون قائد
احنا كنا مخدوعين في مبارك
الظلم دايما نهايته وحشه و دايما ربنا بيقتص للمظلومين من ظالمهم
و إن مش فاهم روح اقرا تاريخ كويس
المصريين خلصوا ثورتهم و حققوا مطلبهم اﻷشد صعوبه في وقت أقل من تونس
مع احترامي لشعب تونس
العالم كله كان مترقب و متابع للأحداث في مصر أكتر من تونس
و ده يدل على أهميه مصر
إسرائيل مرعوبه من المصريين و ده باين من التصريحات اللي كل شويه بيعملوها
يعني كل الفساد و الضياع اللي حاولوا يعملوه في الشباب المصري اتقلب عليهم دلوقتي
العالم كله هيعمل ألف حساب لمصر و للمصريين بعد كده
ناس كتير كروتها اتحرقت في الثوره و بانت نواياهم و دماغهم التعبانه
زي أيمن نور, و البرادعي , وتامر حسني و طلعت زكريا و أحمد بدير و التليفزيون المصري و غيرهم كتير
السبب اللي كان موقف حال البلد مش الناس اللي في التحرير, ﻷ
السبب هو البلطجية اللي هربوا من السجن تحت عين الشرطه
كل واحد نزل  الشارع في لجنه شعبيه اتعرف على جيرانه اللي كان بالكتير بيقولهم السلام عليكم
طبعا الشارع عندنا كله يعرف بعضه إلا إنا بس الحمد لله عرفنا بعض و كنا بنمشي نعمل دوريات في الشوارع مع بعض
الناس كلها عندها في البيت أسلحه, تقريبا كل الناس اللي في دمياط عندهم سيوف
و اللي معندوش سيف, أخد امطه أو مبرد من الورشه و راح للحداد عملها سيف
الأمطه (القمطه, القامطه) هي أداه يستعملها النجارين لتثبيت الخشب في بعضه
بس أنا كنت بنزل بالمنشاكو بتاعي
فيه روح عاليه أوي بين المصريين و حب للخير و كان ظاهر في ميدان التحرير و اللجان الشعبيه
المصريين كانوا مفكرين نفسهم ضعفاء بس ثبتلهم عكس ذلك و هما بيثبتوا البوكس و بيفتشوا عربيات الشرطه في الكماين الشعبيه
كان ناقص يدوهم مخالفه عشان مش لابسين الحزام
إن المصريين إيد واحده مسلم و مسيحي
إن الشعب المصري أثبت إنه مش سلبي و إنه لما بيقوم ما يوقفوش لا بوليس و لا رصاص و لا قنابل
إن الشباب المصري كان عكس كل التوقعات و طلع أكثر رقيا مما كان يظهر على مصر
إن الفيس بوك سلاح ذو حدين و ممكن يستعمل في كلا الاتجاهين
و حاجات كتير صعب إن الواحد يحصرها هنا
__________________________________________
بس المهم دلوقتي: ماذا بعد الثوره؟
يعني نعمل إيه دلوقتي؟
----------------------
زي ما كل الناس بتقول
ما نرميش زباله في الشارع تاني
ما نعطيش الموظفين رشاوي تاني
ما نسكتش على حقنا تاني
نقف للظلم في كل مكان
الساكت عن الحق شيطان أخرس
بس اللي أنا شايفه أهم من ده كله هو أن الواحد لازم يبدأ يشتغل و يشتغل و يشتغل على رأي دكتور هشام المنجي
مصر لسه قدامها كتير مش هنحقق كل أحلامنا إلا لما نشتغل و نتعب عشانها
و ما نيل المطالب بالتمني و لكن تؤخذ الدنيا غلابا
و اللي بيفكر يسافر يعيد التفكير, ايه اللي ممكن يقدم للبلد لو ما لم يسافر, و ازاي ممكن يحقق أحلامه و طموحاته في مصر و يخليها فعلا جنه
إللي مش لاقي شغل يدور تاني و تالت و رابع, و ياكل الظلط عشان يضيف حاجه لبلده و يحس بوجوده
لازم بعد كده كله يشارك في الانتخابات
كل واحد فينا لازم يبقى إيجابي و يحاول يغير المجتمع اللي حواليه للأحسن و يوسع دايره تأثيره و يفعَلها
و في اﻵخر أحب أفكركم زي ما دايما بعمل
إن الله لا يغير ما بقوم حتى يغيروا ما بأنفسهم
و أكيد كلنا شفنا تأثير اﻵيه دي و إن المصري الحقيقي ظهر لما بطل يخاف و يقول خليني أربي العيال و إن إزاي ربنا عوض صبرنا خير
و أخيرا أقول لكم
أراكم في الجنه مع شهداء ثورتنا التاريخيه