Sunday, June 20, 2010

أقوال

**********
*them
-me
**********


قيلت لي منذ زمن
------------
الطيب في البلد دي بياخد علي قفاه*
لا يا راجل, انتا بتتكلم ازاي-
###############
يابني قوم ذاكر*
ان شاء الله-
###############
من غير واسطه ما تحاولش*
انا هدخلها بقدراتي-
===========================================
قيلت لي و لم افهمها
-------------
كمبيوتر ايه الي انتا رايح تاخد فيه دورات, اتعلم الصنعه احسن.... خد صنفر دي*
ما بحبش اصنفر-
###############
رقمه اهه, كلمه و اتعرف عليه*
اكلم واحد ما اعرفوش و اتعرف عليه بمناسبه ايه, انا اساسا ما بحبش الوسايط-
###############
البنت دي محترمه "كيك" (كيك عشان الرقابه)ه*
ازاي محترمه و "كيك"ه-
###############
لابس شبشب ليه, اطلع اقف مع المتذنبين*
هو حضرتك مش شايف الجبس ولا ايه-
###############
بس يا سيدي, و جالي تسمم و رحت المستشفي*
هو انت كنت بتقرقضهم ولا بتاكلهم؟-
###############
احنا ما بناخدش الاحسن, احنا بناخد اللي نلاقيه قدامنا*
ازاي يا كابتن, ده انا التالت و انتا عايز عشره.... ده انتا اخد الحداشر-
###############
انتا هتخلص كليه امتي*
الترم ده , و لا السنه دي , و لا الكليه كلها؟-
===========================================
قيلت لي و افزعتني
-------------
هيللو, از ذس اهماد ال زيكي ال اباسي*
وات,....ييس, هو از ذس؟-
###############
خليك معايا السنه دي و هدخلك المنتخب*
:(مش هاينفع يا كابتن -
###############
العيال دول تجيبلي بطايقهم*
!!!!-
===========================================
قيلت لي و احزنتني
-------------
عايزين يقتلوا الواد, و كل اما يمشي جنبهم يضحكوا عليه و يشاوروا لبعض و بيرشوا ماده سامه علي الواد*
"دماغي-1)"طب و الحاله دي بتجيلك بقالها قد ايه, يعني ما حاولتش تشوف دكتور)-
###############
ربنا يسامحها بقي يا استاذ احمد, قطعت عيشي*
عوضك علي الله-
===========================================
قيلت لي و افرحتني
-------------

===========================================
قيلت لي بلسان الحال
--------------
اياك حتي تفكر, احنا بينا مسافه كبيره*
و انا بييس-
#############
انا اهو انا اهو*
و الله لو اتقلبتي قرده ما هبصلك رغم انني بحب القرود-
#############
ما تفكرش العضلتين اللي طالعينلك دول هيخوفوني, انا ما بخافش*
ما بتتقاسش بالعضلات, و بعدين ما تقف في حته ناشفه-
===========================================
قيلت لي بلسان المقال
--------------
كل حاجه في الدنيا دي 90% تدريب, و 10% موهبه*
يظهر ان المشوار طويل اوي-
##############
من ال 50 واحد دول... انتوا التلاته بس اللي هاتبقوا ظباط*
يسمع من بقك ربنا-
##############
اطلعوا بره, كلكوا سقطتوا*
يعني نلبس و نروح؟-
##############
و بعدين ضربني عليها و قاللي عمار يا مصر*
و طبعا ده كان قدام جمهور من الظباط و الطلبه المتقدمين-
===========================================

Tuesday, June 8, 2010

.............بدون عنوان



اذا اردت شيئا بشده فعليك ان تطلق سراحه, فإن عاد اليك فهو لك و الا فهو لم يكن ملكك من البدايه

damn it, I just ended up loosing all the good stuff...
************************************************************
امبارح كنت رايح عند حبه من اصحابي عشان نذاكر لامتحان ماده "الكومبيلرز" او "لغات البرمجه و المترجمات" و ان مش فاهم ما تتعبش نفسك, و كان المفروض نتقابل بعد العصر بس انا حصلي موقف غريب اخرني و خلاني اوصل بعد المغرب

بصراحه انا مش عارف اوصف الموقف, و غالبا مش هقول كل اللي حصل (لأسباب كتير) , و بصراحه برضه انا لحد دلوقتي مش عارف انا المفروض اتعلم ايه من الموقف ده, و لا حتي اسمي البوست ايه , و عليه فأنا هاقوله و خلاص
***********************************************************
مدونه العباسي للانتاج و التوزيع تقدم لكم

دماغي 1: النفس اللوامه
دماغي -1: النفس الاماره بالسوء


***********************************************************
كان المفروض نتقابل عند سلام و ابو شادي بعد العصر بس انا فضلت انني اقرأ حبه محاضرات قبل ما اروح عشان ما اقعدش زي البطيخه و علي الساعه 7 كنت وصلت لحيطه سد فقررت انزل و اروح لهم
بعد ما لبست هدومي و لسه نازل علي السلم اقيت اللي بيقوللي

الراجل: الا عندكم حد بيفهم في الكمبيوترات او بيصلحها
WTF :دماغي -1
دماغي 1: هو انا باين عليا و لا ايه
انا: ايه, بتقول ايه
دماغي 1: ايوه اعمل اطرش ياخويا
الراجل: بقولك عندكم حد بيفهم في الكمبيوترات, اصل الكمبيوتر عندنا باظ
دماغي -1: قوله ما اعرفش, هو مش البواب حذرنا من الراجل ده اول ما سكننا و قالنا انه بتاع مشاكل و مجنون و بيتخيل حاجات و حراميه و انقلابات
دماغي 1: يعني انت كنت شفت منه حاجه
انا: اه تقريبا هم فوق يعرفوا في الحاجات دي
دماغي -1: اجري ..... اجري .... يمكن تفهملك اي حاجه لو وصلت دلوقتي
دماغي: يا كداب يعني انت ما تفهمش في الكمبيوترات
دماغي -1: انا ما قلتش كده
دماغي 1: انما الاعمال بالنيات و انما لكل امرؤ ما نوى

*********************
يظهر ولد يبدو عليه انه ما بين 13 و 16 سنه خلف الرجل
انا كنت مفكر ان ابنه كبير عن كده
*********************
الراجل: يعني انت ما تعرفش في الحاجات دي
دماغي -1: قوله لأ , يابني انت مش فاضي
دماغي 1: احنا مش اتفقنا ان الكذب از اوت اوف ذا كويستشن
انا: هو الجهاز ماله بالظبط يا حج؟
الراجل: الجهاز بتاع الواد ما بيفتحش و مش عارف ايه المشكله اللي فيه
انا: طب وريني كده يا حج




**********************
دخلت الشقه و هي زي بتاعتنا بالظبط
و كان الكمبيوتر في الوش كده يعني انا ما توغلتش اوي
وقفت قدام الجهاز و بعدين
**********************
انا: هو ماله بقي يا حج؟
الراجل: ما بيفتحش خالص من نفسه كده
انا: طيب
دماغي 1: اعمل بقي شغل مهندسين, بص علي الباور الاول يمكن الجهاز مش واصله كهربا
دماغي 1: اه شوفت, زرار الشاشه مش مفتوح
**********************
قعدت العب في زرار الباور
و الجهاز ما بيفتحش
*********************
دماغي -1: ايه الاحراج ده , امال مهندس كمبيوتر ازاي...... اياك تقوله
********************
الراجل شاورلي علي زرار في الباور سابلاي
ضغطت عليهو الجهاز نور
و في نفس الوقت ....
*******************
الراجل: ما بيقعدش عليه غيره هو و المدرس بتاعه
دماغي 1: مدرس ايه
الولد: بابا .... اجيبله حاجه ساقعه يا بابا؟
دماغي 1: لا حول ولا قوه الا بالله , تقريبا الولد "بسيط" رغم ان مش باين عليه
دماغي -1: قصدك علي قده.... يمكن عشان كده المدرس
دماغي 1: ملناش دعوه


******************
الجهاز كان مفتوح من الجنب
فقفلته و قعدت اضغط علي الكروت
يمكن يشتغل زي جهازي القديم
بس برضه مش شغال
******************
دماغي 1: طب و بعدين
دماغي -1: قوله مش عارف و امشي انت وراك امتحانات
دماغي 1: بس الولد صعب عليا صراحه ومش عايز امشي و الجهاز مش شغال
دماغي -1: شكلك هتبات عندهم انهارده
******************
بعد ما قلت للراجل ان انا مش عارف اصلحه
و انه الاحسن يوديه سيبر
اكتشفت انه مش عايز ينزل
و كان مستعد يديني فلوس عشان اجيبله رامات او اصلحهوله
مع العلم انه لسه حتي ما يعرفش اسمي
******************
دماغي -1: طب ليه؟؟؟؟
دماغي 1: افتكر الفضول الذي قتل صاحبه
الراجل: طب انت ما تعرفش حد ممكن يصلحه
دماغي 1: قوله علي اللي انت موصل النت منه
انا: اه اعرف واحد ورانا هنا
*******************
و بعد ما اعطيته الرقم و اتصل بيه اداني التليفون عشان اكلمه انا
و طبعا الراجل بتاع السيبر سألني علي العنوان و الاسم
فاقلتله العنوان و سألت الراجل علي الاسم , و هنا عرفت انه عقيد متقاعد من الجيش
فقاللي انه هايجي بعد ربع ساعه
*******************
دماغي -1: ياللا بقي انت وراك هم ما يتلم
انا: طب يا حج امشي انا بقي عشان اتأخرت و ورايا مشاوير
الراجل: طب قعد بس و اشرب الحاجه الساقعه
انا: مهلش يا حج انا اتأخرت
الراجل: اقعد بس, يعني انتا لو اتأخرت شويه هايحصل ايه
دماغي -1: و انت مال... انت مش هاتسيبني امشي و لا ايه
دماغي 1: سيكاهاااا , مالوش لازمه الكلام ده
******************
و بعد عده محاولات اكتشفت ان الراجل مش هيسيبني امشي لحد ما الراجل بتاع السيبر يجي
و انا كنت قلتله ان عندي امتحانات و متأخر و كده
******************
الراجل: و امتحانك الساعه كام؟؟
دماغي -1: و انت مال ... و كمان هو مفكر ان انا رايح امتحان دلوقتي, دي الساعه 7 و نص
دماغي 1: اشرب الحاجه الساقعه و روق دمك
انا: لأ انا امتحاني بكره بس رايح لأصحابي بنذاكر سوا
دماغي -1: قصدك بيذاكروا و انت بتتفرج
دماغي 1: يعني مش على طول
الراجل: و ماده ايه دي
دماغي -1: يعني هاتفهم اوي
......انا: دي ماده تبع الكم
دماغي -1: امسك نفسك يا وديع , بلاش فضايح مانتا لسه كنت زي خيبيتها في تصليح الكمبيوتر
انا: ماده اسمها كومبيلرز
دماغي -1: اهو كده مايفهمش.... احسن
الراجل: و انت بقي في كليه ايه
دماغي -1: تبا.... لو سأل علي القسم قوله اتصالات
انا: كليه الهندسه
الراجل: اللي فيين دي
دماغي -1: نعم يا روح امك, يعني هاكون في اسكندريه و في جامعه اسيوط
دماغي: ما بس بقي يا بني, يمكن قصده علي المكان
انا: اللي في الشاطبي
الراجل: اللي جنب استاد الجامعه
دماغي -1: ما انتا حلو اهو
دماغي 1: شوفت بقي ظلمت الراجل ... استغفر الله العظيم
......الراجل: طب , بما انك مهندس يعني
دماغي 1: ما بلاش الكلمه دي لحد اما احس اني استاهلها
الراجل: شوفت الشارع اللي قاعدين يصلحوا فيه ده
******************
كان الشارع اللي احنا ساكنين فيه قاعدين يكسروا فيه كل شويه و يهدوا الرصيف عشان يرصفوه تاني
و شكله فكرني مهندس مدني و قعد يشرحلي ان اللي عمل الرصيف مش فاهم حاجه لأن فيه بلاعه
بتاخد من 4 عمارات و لو حصل انسداد هايضطروا يكسروا الرصيف تاني و المفروض كانوا يعملوا ايه
و ده دخلنا لموضوع السرقه و الرشاوي و ان اللي بيعمل حاجه بيبقي عشان الفلوس
و مش همه ان الحاجه تتعمل كويس او صح
و بينما هو قاعد يكلمني رن جرس الباب و كان الباب مفتوح اساسا
*******************
الابن: ااا ... بابا كلم
الراجل: قوله يدخل
دماغي -1: يا رب يكون بتاع السيبر
الراجل: ادخل يا اندرو
********************
و كان اندرو جايب للراجل سجاير
********************
دماغي -1: لأ شكله ما بينزلش من البيت
********************
لكن اندرو غلط و جاب علبه واحده بدل 4 فرجع تاني يجيب الباقي
يظهر ان مش انا بس اللي بجيب من الراجل المسيحي
بس من غشنا فليس منا و عليه فكده احسن
******************
دماغي -1: تبا
******************
و رجع الراجل يكمل و بدأ يحكيلي ازاي ان مافيش مدرسه كانت راضيه تقبل ابنه
و حتي بعد ما جاب توصيه من المحافظ برضه لما دخل المدرسه كان العيال اللي اكبرمنه بيضربوه
بتوصيه من المدرسين اللي كانوا ما بيحبوش ابوه
*******************
دماغي 1: انا مش عارف الراجل ده بيقول الحق و لا بيكدب بس لو اللي بيقوله حصل يبقي حرام ان حد يحاسب حد بعمل حد تاني او ينتقم من حد في اولاده كده خصوصا في ظروفه دي

*******************
و رجع تاني يشرحلي الرصيف كان المفروض يتعمل ازاي و هو بيشرب سيجاره و فضل يلف حوالين نفس المواضيع
و يكلمني في ان انا غلط اني انا و اصحابي اجرنا في المنطقه دي و في العماره دي بالذات و انا متفق معاه
******************
دماغي -1: السجاير دي رغم انها رخيصه الا ان ريحتها حلوه
دماغي 1: اياك تفكر حتي
دماغي -1: لأ ده انا بشم بس
دماغي 1: ولا حتي تشم , افتكر سرطان الرئه و الالتهاب الرئوي و الربو
دماغي -1: .....خلاص
دماغي 1: اللي يزعل هو ابنه اللي مالوش حد غيره, طب الراجل مش متجوز و عمال يحرق في سجاير و كده يمكن يموت صغير ... طب ابنه هيروح فين
*********************
و كان اندرو رجع تاني بباقي السجاير و ما هي الا دقائق الا و الراجل بتاع السيبر كان جه وراه و دخل و بدأ يشوف شغله
و هنا الراجل كان اطلق سراحي و سابني امشي
و انا ماشي قالي حاجه غريبه اوي
**********************
الراجل: شوف يابني, لو عايز اي حاجه ماتترددش انك تيجي تطلبها مني , و لو عايز مكان تبات فيه احنا عندنا هنا اود"غرف" فاضيه كتير و لو محتاج فلوس اكل اي حاجه تعالي
دماغي -1: نعم (علي طريقع اللمبي)؟
this man is lonely:دماغي 1
انا: ربنا يخليك يا حج .... شكرا
الراجل: ابقي عدي اقعد معانا حبه و كده
انا: ان شاء الله
دماغي -1: اه, من بتاعت ماما
دماغي 1: نو كومنت
*********************
و نزلت و كانت المغرب اذنت فدخلت اصلي في المسجد
********************
انا احد دلوقتي مش عارف الموقف ده حصللي ليه, يا تري المفروض اتعلم منه حاجه و لا حتي اسميه ايه
و عشان كده اسم البوست بدون عنوان
بس انا متخيل ان اللي انا اتعلمته ان المفروض الواحد ما يحكمش علي حد من حاجه سمعها لأن دي منتهي السطحيه
و المفروض الناس تربي اولادها كويس انهم ما يستضعفوش غيرهم
انا لحد دلوقتي او بتشاكل مع حد (مع قله المواقف دي) لو لقيت اللي قدامي مش عارف يعمل معايا حاجه او اضعف مني بسيبه
و كمان مينفعش حد يحاسب حد بأعمال حد تاني
********************
كل دي مجرد افكار بحاول اطلعها من موقف حصللي لأني مقتنع ان مافيش حاجه بتحصل للانسان من غير سبب و عليه فإن الانسان لازم يعصرها عشان يطلع منها حاجه يستفيد بيها
ممكن اللي انا شوفته يكون من وجهه نظر معينه, و ممكن وجهه نظر تانيه تشوف حاجه تانيه بس المهم ان الواحد لما يتعلم حاجه تكون حاجه بترتقي بيه مش حاجه بتقلل منه او تبوظ مفاهيمه
و اتمني تكونوا اتعلمتوا حاجه

Sunday, June 6, 2010

ساعه تروح و ساعه تيجي


اذا اردت شيئا بشده فعليك ان تطلق سراحه, فإن عاد اليك فهو لك و الا فهو لم يكن ملكك من البدايه

to what extend does this saying work????!!
*****************
الاسبوع ده كان مختلف بكل ما تحمل الكلمه من معني
انا انهارده خلصت امتحان "بحوث العمليات"ا ك ا أو أر
المواقف اللي حصلتلي الاسبوع ده اظهرتلي حاجات كتير ما كنتش شايفها
شوفت ناس عملت معايا حركات رجوله كتير من غير ما اطلب منهم اي حاجه ربنا يوفقهم للخير يا رب
رجعلي جزء كبير من حاجات كنت فقدتها رغم انها لسه (ساعه تروح و ساعه تيجي) بس الحمد لله علي كل شيء
الحمد لله الحمد لله الحمد لله الحمد لله
*****************
انهارده في الامتحان حصللي حاجات غريبه
بعد ما كتبت اسمي و الحاجات دي قعدت اقرأ الامتحان , و بعد ما خلصت قراءه كل الاسئله و اللي اكتشفت انها اسئله اغلبها مباشره يعني اللي حل قبل كده هينجز و انا طول التيرم ما حليتش غير 3 مسائل و بإيدي و في جزء مجاش منه حاجه زي اللي كل الناس توقعته
مسكت المسطره باليمين و القلم الرصاص بالشمال و قلت ابدأ اسطر صفحه
ما قدرتش اسطر, القلم مش عايز ينزل علي الورقه
انا: يابني انزل الله يهديك
القلم: لأ, ماليش دعوه ... مش لاعب
انا: يا حبيبي ما تتعبنيش معاك
القلم:مش نازل يعني مش نازل
................
................
تمر فتره صمت رهيبه...... بدأت افقد اعصابي...... انا كنت عارف و متأكد ان ده هايحصل
بوم بوم.....بوم بوم.....بوم بوم.....بوم بوم.....بوم بوم
ااااااااااه
فقدت تركيزي رغم اني كنت مبسوط من الاسئله "اللي لسه ما حليتش منها حاجه" و خلاص كنت علي وشك الانهيار
غريبه ان الواحد يبقي عايز يعيط و ما يقدرش
سيبت القلم و كان عدي 10 دقايق علي الوضع ده
استغفرت ربنا و مسكت القلم باليمين المره دي و برده نفس النتيجه
قعدت فتره قبل ما استجمع شجاعتي عشان اخد اول خط
و الحمد لله عقبال التاني
ما انت بتستهبل يا عباسي ما كنت تمسك القلم باليمين من الاول
و طول ما الوقت بيمر و اللي كنت مستنيه بيحصل (كنت مستنيك يا مان) و اقرأ ارقام غلط و اكتب ارقام غلط
و ده بيأثر في الناتج النهائي طبعا , بس انا كاتب الارقام اللي انا استخدمتها (يا رب الدكتور ما يكونش بيصحح علي الناتج النهائي) و مسائل تانيه ماشوفش فيها حاجات........ و كل ده بس انا خرجت من الامتحان مبسوط جدا جدا
يمكن مش هاجيب درجه كبيره (رغم اني محتاجها) بس انا مبسوط
انا كنت متوقع اني يجيلي انهيار عصبي اول ما الامتحان يبدأ و اخد بعضي و امشي (و الظاهر مش انا بس اللي كنت متوقع كده و ده من المكالمه اللي جاتلي و انا رايح الكليه) الحمد لله
يا عم......المهم صحتك
***********************
لحد دلوقتي مش عارف الوم نفسي علي اللي بيحصلي و لا الوم ناس تانيه بس لأني لسه مش متأكد
my mind is playing tricks on me
المهم دلوقتي اللي ساعه تروح و ساعه تيجي تبطل تروح
و الحاجات التانيه تبطل تيجي و تروح علي طول